د مختلفو رسنیو څخه له دېرشو زیاتو خبریالانو چې یوه پنځه اونیزه زده کړیزه دوره یې پای ته ورسوله، نن یې خپلې تصدیق پاڼې ترلاسه کړې.
د (خبریالان او قوانین) عنوان ترنامه لاندې زده کړیزه دوره د افغانستان د ژورنالیستانو د ملي اتحادیې له لوري په کابل کې د پولند سفارت په همکارۍ ترسره شوه.
د دغه زده کړیزې دورې ګډونوالو، د اساسي قانون، د ټولیزو رسنیو د قانون، د کاپي رایت قانون، جزا قانون، د داخلي او خارجي امنیت پروړاندې د جرمونو قانون، ټاکنو قانون او د مالیاتو قانون په ګډون د مختلفو قوانینو د احکامو په اړه چې رسنیز فعالیتونه منظم کوي، زده کړې ولیدې.
د افغانستان د ژورنالیستانو ملي اتحادیې رییس محمد فهیم دشتي وایي: زموږ اکثره خبریالان په دې باور دي چې تنها د ټولیزو رسنیو قانون په هېواد کې د رسنیزو فعالیتونو تنظیموونکی دی، په داسې حال کې چې نور قوانین هم په دې اړه داسې حکمونه لري که چېرته خبریالان له هغو څخه خبر نه وي، امکان لري چې د خپل کار په ډګر کې له حقوقي ستونزو سره مخ شي.
همدارنګه د دغه زده کړيزې دورې د ګډونوالو لپاره د ژورنالیزم د حرفوي معیارونو او اخلاقي موازینو په اړه هم ورته زده کړې ورکړل شوې.
د هغه پلان پر اساس چې د افغانستان د ژورنالیستانو ملي اتحادیې طرحه کړی دی، دغه زده کړیزه دوره به په څلورو نورو ولایتونو کې هم په لار واچول شي.
د سه شنبې په ورځ به دغه زده کړیزه دوره چې ۲۲ خبریالان پکې ګډون لري په ننګرهار ولایت پیل کیږي او راتلونکې اونۍ به دې ته ورته مشخصاتو سره په خوست ولایت کې په لار واچول شي.
نږدې ده چې د لیندۍ میاشتې په لومړنۍ نیمایي کې د هرات او بلخ ولایتونو یو شمېر خبریالان هم له دا ډول زده کړو مستفد شي.
د افغانستان د ژونالیستانو ملي اتحادیې، په دوو وروستیو میاشتو کې مختلفې زده کړیزې دورې په کابل کې په لاره واچولې چې له مختلفو رسنیو څخه په لسګونو خبریالانو له دغه زده کړو څخه ګټه واخیسته.
د یادې اتحادیې د مسوولینو په وینا، نږدې ده چې په راتلونکو میاشتو کې هم، د یادې اتحادیې له لوري زده کړیزې دورې په مختلفو ولایتونو کې په لاره واچول شي.
