د هلمند د پولیسو مسوولین وایې، چې تېره ورځ د بست سیمه ییزې رادیو خبریال، نور احمد نوري مړی یې د لښکرګاه ښار څخه پیدا کړی دی. نوري چې د بسټ رادیو د دیني خپرونو مسوول وو، له دې وړاندې یې د نیویارک ټایمر ورځپاڼې سره همکاري هم کوله. د نوري د کورنۍ غړي په دې باور دي چې د هغه وژل کېدل د نوړي له خبریالي فعالیتونو سره هم اړیکه لري.
د ښاغلي نوري ورور، سید رفیع الله وایي: له څو مودو راپه دې خوا، نوري د نامعلومو کسانو له لوري د تلیفون په وسیله تهدید کېدلو. د هلمند پولیسو د مسوولینو په وینا، هغوی د نوري مړی چې په یوه بوجۍ کې اچول شوی وو له ښار څخه پیدا کړی. د هغوی په وینا د نوري پر بدن د وهلو او ټکولو او همدارنګه د چاقو اثار ښکاره شوي دي.
په هلمند کې د افغانستان د ژورنالیستانو د ملي اتحادیې استازی، شکرالله شاکري وایي، چې د هلمند والي د لښکرګاه ښار په مرکزي روغتون کې د شپې په نیمایي کې د نوري د کورنۍ له غړو سره ژمنه کړې چې د دغه قتل عاملین به ډېر ژر ونیول شي.
په همدې حال د هلمند امنیتي مسوولین وایي، چې د ښاغلي نوري د وژل کېدلو دليل تراوسه نه دی په ډاګه شوی او هغوی په دې اړه خپلو څېړنو ته ادامه ورکوي.
په تېرو کلنو کې، لسکونه تنه خبریالان، په بېلابېلو ډولونو او د هېواد په مختلفو برخو کې وژل شوي دي؛ مګر تراوسه، حتا په یوه مورد کې هم د دغه قتلونو عاملین نه دي نیول شوي.
د افغانستان د ژورنالیستانو د ملي اتحاديې اجرایوي رییس، محمد فهیم دشتي وایي: د قتل د عاملینو په پېژندلو او نیولو کې د حکومت بې پروایي د دې سبب شوې ده، چې د بیان آزادۍ دښمنان په ډېره زړورتیا سره خبریالان هدف ګرځوي.
په هغه اعلامیه کې چې د یادې اتحادیې له لوري خپره شوې ده، د کورنیو چارو له وزارت او ملي امنیت له ریاست څخه غوښتل شوي، ترڅو د نوري د قتل قضیه د نورو خبریالانو د قضیو په شان ګنګه پرې نږدي او حتا د یو ځل لپاره د خبریالانو د ځان په وړاندې خپل مسوولیت ترسره کړي.
