په هغه ځانمرګي برید کې چې نن د کابل په کارته نو سیمه کې ترسره شو، د دې ترڅنګ چې د کابل یو شمېر ښاریانو خپل ځانونه له لاسه ورکړل او یو شمېر نور ژوبل شول، یو ځوان خبریال هم په شهادت ورسېد. ۲۰ کلن محمد شاهد نعیمي، چې له نوا رادیو او سبا تلویزیون سره همکار وو، په داسې حال کې چې له کور څخه د کار په لور روان وو، د دغه ځانمرګي برید قرباني شو. شهید شاهدالله نعیمي د نوا رادیو او سبا تلویزیون سره د همکارۍ ترڅنګ د ښوونې او روزنې پوهنتون د ادبیاتو په څانګه کې محصل هم وو.
په یوه وروستۍ اونۍ کې، دغه دویم خبریال دی چې خپل ځان له لاسه ورکوي. تېره پنجشنبه د هلمند ولایت په لښکرګاه ښار کې د بست سیمه ییزې رادیو خبریال او د نیویارک ټایمر ورځپاڼې همکار، نور احمد نوري د نا پېژندو کسانو له لوري ووژل شو.
د خبریالانو صنفي او ملاتړو بنسټونو، دغه دوو پېښو ته په پام سره، د خبریالانو له خوندیتوب څخه خپله اندېښنه ښکاره کړې ده.
د افغانستان د ژورنالیستانو ملي اتحادیې اجرایه رییس، محمد فهیم دشتي وایي: د یوې وروستۍ اونۍ پېښې ښکاره کوي، چې د خبریالانو پروړاندې تهدیدونه او خطرونه ته کومې کچې لوړ شوي دي.
دشتي زیاتوي: د خبریالانو او رسنیزو فعالینو د خوندیتوب لپاره اړتیا ده، ترڅو د دوی په مېنځ کې همغږي د هېواد په کچه رامنځته شي.
