په بېلابېلو ولایتونو کې خبریالانو او رسنیزو فعالینو د هلمند ولایت د بست رادیو د خبریال، نور احمد نوري د قتل پروړاندې، په لارینونو لاس پورې کړی دی.
په کندز ولایت کې د افغانستان د ژورنالیستانو ملي اتحادیې مسوول، رحمت الله حرمت وایي: نن یو شمېر خبریالانو او رسنیزو فعالینو په یوه سوله ییزه غونډه کې د ښاغلي نوري وژل کېدل وغندل او له امنیتي بنسټونو یې غوښتي، چې د دغه قضیې عاملین په ډاګه او د قانون منګولو ته وسپاري.
د ښاغلي حرمت په وینا، د دغه غونډې په وروستیو کې، پرېکړه لیک هم صادر شو چې مهم ټکي یې دا وو.
موږ د شمال ختیځې حوزې خبریالان، له دولت غواړو ترڅو د خبریالانو ځاني خوندیتوب ته پاملرنه وکړي.
د هرات ولایت خبریالانو په همدې اړه یوه لویه غونډه جوړه کړې وه او د یادې قضیې د جدي پلټنې غوښتنه یې کړې وه.
په هرات ولایت کې د افغانستان د ژورنالیستانو ملي اتحادیې مسوول، قدیر شاهین وایي: په دې غونډه کې په هرات ولایت کې د خبریالانو صنفي او ملاتړي بنسټونه او د مختلفو رسنیو خبریالان راټول شوي وو.
د ښاغلي شاهین په وینا: د هغوی غوښتنه دا وه، ترڅو د ښاغلي نوري د قتل عاملین ژر تر ژره ونیول شي.
هغوی همدارنګه له دولتي مسوولو بنسټونو غوښتي، چې د هغه خبریالانو چې په تېرو کلونو کې د هېواد په بېلابېلو برخو کې وژل شوي د هغوی دوسیې هم وڅېړل شي.
نږدې ده چې سبا په مزارشریف ښار کې دې ته ورته غونډه ترسره شي.
