د افغانستان د ژورنالیستانو ملي اتحادیې او د تخار خبریالانو په یوه اعتراضي غونډه کې، د صدام حسین بشاش پروړاندې د دشت قلعې ولسوالۍ د پولیسو د یو شمېر منسوبینو توهین، تحقیر وهل او ډبول په تخار کې د آینې سیمه ایز تلویزیون خبریالان په سختو ټکو غندي. په دې ناسته کې د افغانستان د ژورنالیستانو ملي اتحادیې په دفتر کې ترسره شوې وه، د تخار خبریالانو د یاد ولایت د پولیسو د امنیه قومندان له لوري د آینې سیمه ایز تلویزیون د خبریال صدام حسین بشاش د وهلو او ډبولو د څنګه والي د څېړنې غوښتنه کړې او د تخار له نظامي څارنوالۍ څخه یې غوښتي ترڅو د دغه پېښې عاملین مجازات کړي.
د افغانستان د ژورنالیستانو ملي اتحادیه، د تخار خبریالان او د افغان خبریالانو د خوندیتوب کمېټې د تخار پویسو له مسوولینو د لاندې مواردو د عملي کېدو غوښتونکي دي.
۱ــ د هغو کسانو نیول او څېړنه، چې صدام حسین بشاش یې وهلی ډبولی دی.
۲ــ د صدام حسین بشاش د ځان خوندیتوب او همدارنګه په دشت قلعه کې د نوموړي د کورنۍ خوندیتوب.
۳ــ پولیس په ولسوالیو کې د دغه بنسټ ټولو مربوطه اداراتو ته د یوه رسمي لیک په ترځ کې د ښه چلند او خبریالانو ته د اطلاعاتو د راټولولو زمینه برابرولو امر وکړي.
د یادونې وړ ده، چې د دشت قلعه ولسوالۍ د پولیسو مسوولینو په تهدید سره له سیمه ایز خبریال، صدام حسین بشاش څخه برائت خط اخیستی دی. چې د تخار د ژورنالیستانو د ملي اتحادیې په نزد حقوقي او قانوني جنبه نه لري او دا پرونده د یاد بنسټ له لوري تعقیب کیږي. بشاش پرون په دشت قلعه ولسوالۍ کې د تصویر اخیستلو په وخت کې د یدې ولسوالۍ د پولیسو له لوري وهل شوی او ډبول شوی دی.
