د بینوا سایټ مسوول، هادي خالد تېره ورځ په داسې حال کې چې غوښتل یې له کندهار څخه د کابل په لوري پرواز وکړي، د کندهار په هوايي ډګر کې ونیول شو.
ښاغلی خالد یوه اونۍ وړاندې کندهار ته راغلی وو او پرون له کندهار څخه د وتلو په وخت کې د کندهار د والي په هدایت د یاد ولایت د ملي امنیتې ځواکونو له لوري نیول شوی دی.
د کندهار ولایت د ویاند له قوله ویل کیږي چې خالد د مطبوعاتي او غیر مطبوعاتي تورونو په دلیل نیول شوی دی. له دوو ورځو راپه دې خوا ښاغلي خالد د کندهار ولایت د ملي امنیت په ریاست کې بندي وو.
د افغانستان د ژورنالیستانو ملي اتحادي ته له رارسېدلو خبرونو ښکاري چې د کندهار والي ښاغلی خالد په بېنوا سایټ کې د والي په اړه د خپرو شوو مقالو او لیکنو په دلیل نیولی دی.
د افغانستان د ژورنالیستانو ملي اتحادیې مسوولین وایي چې د مضامینو او مطالبو د خپرولو په دلیل د یوه خبریال او لیکوال نیول په هېڅ صورت قانوني اړخ نه لري؛ خو دا چې لګول شوي تورونه د ټولیزو رسنیو قانون حکمونو پر بنسټ د ټولیزو رسنیو د کمیسیون له لوري بررسي شوي وي او د هغه جرم د عدلي او قضایي بنسټونو له لوري ثابت شوی وي.
د افغانستان د ژورنالیستانو ملي اتحادیې اجرایه رییس، محمد فهیم دشتي وایي: له هادي خالد سره د کندهار د والي چلند په هغه صورت کې چې پر ښاغلي خالد لګېدلي تورونه تنها رسنیزو مسیلو ته محدود وي، پوره غیر قانوني دي.
د افغانستان د ژورنالیستانو ملي اتحادیې په هغه خپره شوې اعلامیه کې ټینګار کړی دی چې له اطلاعات او کلتور وزارت، لویې څارنوالۍ او د ملي امنیت له ریاست سره به په اړیکو کې دغه قضیه وڅاري.
