د ملي رادیو تلویزیون لسګونو اداري او حرفوي کارکوونکي تېره ورځ د دغه ادارې مخ ته راټول شوي وو او د خپلو حقونو د نه ورکړې په اعتراض یې تهدید کوو چې د ملي رادیو تلویزیون نشرات بندوی. د اعتراض کوونکو په وینا له څو میاشتو راپه دې خوا د اضافه کاري امتیازات او حق الزحمه یې نه دي ورکړل شوي او د دغه دارې مسوولین او د اطلاعات او کلتور وزارت چارواکو هم په دې اړه د دوی غوښتنو ته پام نه دی کړی.
اعتراض کوونکي وایي چې د ملي رادیو تلویزیون رییس لازمه کاري وړتیا نه لري او نه شي کولای چې د یادې ادارې د کارکوونکو له حقونو ملاتړ وکړي.
همدارنګه لاریون کوونکو اخطار ورکړی که ترپنځو راتلونکو ورځو د دوی حقونه اجرا نه شي په دوامداره او پراخ لاریونونو به لاس پورې کړي او د ملي رادیو تلویزیون نشرات به هم وځنډوي.
دا په داسې حال کې ده چې د یو شمېر دولتي ورځپاڼو خبریالانو او چلوونکو هم له درېو میاشتو راپه دې خوا د اضلفه کاري حقونه نه دي ترلاسه کړي.
