په مزارشریف ښار کې د لحظې سیمه ییزې رادیو خبریال، خالد آګاه یعقوبي تېره ورځ ووژل شو.
تراوسه د دغه وژنې انګېزه نه ده په ډاګه شوې او عاملین یې هم تراوسه نه دي پېژندل شوي. د بلخ د امنیه قومندانۍ مسوولینو ویلي دي چې د دغه قتل په تړاو د دوی پلټنې پیل شوي دي؛ مګر تراوسه کومې پایلې ته نه دي رسېدلي.
د بلخ ولایت امنیه قومندان، عبدالرحمان رحیمي خبریالانو ته ویلي چې مرمۍ د یعقوبي په ستوني لګېدلې وه او نوموړي روغتون ته تر رسېدوړ وړاندې خپله ساه ورکړې ده.
د لحظه رادیو د مسوولینو په وینا، یعقوبي له پنځو کالو راپه دې خوا د تفریحي او ټولنیزو خپرونو په چمتو کولو کې له دغه رادیو سره همکار وو.
د لحظه رادیو مدیر مسوول، محمد فهیم حقبین وایي: لومړني اطلاعات په ډاګه کوي چې وسلوال کسان د یعقوبي کو رته د ننه شوي وو او نومړی یې وژلی دی.
د یعقوبي د کورنۍ غړي وایي چې هغه له چا سره هېڅ شخصي خصومت نه درلود. هغوی له امنیتي بنسټونو غواړي چې ژر تر ژره دغه قضیې ته په جدي ډول رسیدګي وشي.
۲۷ کلن خالد آګاه یعقوبي واده کړی وو او دوه ۴ کلن او ۷ کلن ماشومان له هغه پاتي شوي دي. نوموړی د خبریالۍ ترڅنګ د سادات خصوصي پوهنتون د انجینرۍ د څانګې د درېیم کال محصل هم وو.
په مزار شریف کې د افغانستان د ژورنالیستانو ملي اتحادیې مسوول، فردین فردوس وایي چې د خبریالانو صفني او ملاتړي بنسټونه هڅه کوي ترڅو د امنیتی بنسټونو سره په همکارۍ د یعقوبي د قتل عوامل په ډاګه او وڅېړل شي.
