د ننګرهار ولایت ابتدایي محکمې، پاکستاني الاصل خبریال، فیض الله خان په څلور کاله بند محکوم کړی دی.
فیض الله خان چې د(ای آر وای) پاکستاني تلویزیوني شبکې ته کار کاوه نږدې دوې میاشتې وړاندې د ننګرهار د امنیتي مامورینو له لوري ونیول شو. په هغه وخت کې پاکستاني رسنیو داسې راپورونه خپاره کړل چې په هغه کې ویل شوي وو، فیض الله خان افغانستان ته له داخلېدو وروسته تری تام شوی دی.
هغه تورونه چې په فیض الله خان لګېدلي، افغانستان ته غیر قانوني ورود او د طالبانو او د افغانستان د وسلوالو مخالفینو له یو شمېر مشرانو سره د نوموړي لیدنې او خبرې دي.
د ننګرهار ولایت چارواکو تایید کړې چې د فیض الله خان د زندان حکم د ننګرها د داخلي او خارجي امنیت په وړاندې جرمونو د څارنوالۍ له لوري صادر شوی دی.
تراوسه نه ده په ډاګه شوې چې څارنوالۍ د کومو اسنادو او شواهدو په بنسټ په فیض الله خان د زندان حکم کړی دی.
د اي آر وای پاکستاني تلویزیون چلوونکي د یاد خبریال په اړه د څارنوالۍ د حکم خبر تایید کړی او اعلام یې کړی چې له قانوني لارې د دې حکم ننګونه کوي.
ای آر وای د پاکستان د استخباراتو ادارې(آی اس آی) ته له نږدې رسنیو څخه شمېرل کیږي.
