په دې وروستیو کې د اطلاعات او کلتور وزارت عدلیې وزرات ته د کاپي رایت قانون د اصلاح لپاره یوه طرحه لېږلې ده. دا قانون چې اوس مهال د( د مولف، منصف او محقق له حقونو ملاتړ قانون) په نامه یادیږي، په ۱۳۸۶ کال کې د یوه تقنیني فرمان په شکل نافذ شو چې یو شمېر ستونزې لري.
په همدې حال د اطلاعات او کلتور وزارت د دغه قانون د اصلحي طرحې جوړولو په جریان کې د ځینو هغو بنسټونو نظرونه چې له دغه قانون سره سرو کار لري په پام کې ونه نیول. د رسنیزو مشرانو، فلم جوړوونکو، هنرمندانو، لیکونکو، عکاسانو، خبریالانو او داسې نورو …… فعالیتونه په مستقیم ډول د دغه قانون تر حکمونو لاندې کیږي.
دغه بنسټ د افغانستان د ژ،رنالیستانو ملي اتحادیې سره په همکارۍ د عدالت خوښتنې یوه کمېټه جوړه کړې ده ترڅو د دغه قانون د اصلاح لپاره وړاندیزون چمتو او وړاندې شوي وړاندیزونه او همدارنګه د هغه د تصویب لپاره غوښتنه وشي.
د یادې کمېټې لومړنۍ ناسته چې په هغه کې د دوولسو تنو له جملې څخه پکې اتو تنو غړو ګډون درلود د افغانستان د ژورنالیستانو ملي اتحادیې په دفتر کې ترسره شوه او د اطلاعات او کلتور وزارت د اصلاحيطرحې او نافذه قانون له بررسي وروسته تصمیم ونیول شو:
ــ د یو شمېر نورو هېوادونو د کاپي رایت قوانین وژباړل شي ترڅو د نورو هېوادونو له تجربو په کټه اخیستنې سره د دغه قانون طرحه غني شي.
ــ یوه څلور کسیزه کمېټه جوړه شوه ترڅو د عدلیې وزارت له تقنیني څانګې سره په اړیکه کې شي او غوښتنه وکړي چې د دغه قانون طرحه مخکې له دې چې د نظر وړ کمېټې وړاندیزونه دوی ته نه دي لېږل شوي، د وزیرانو شورا ته ونه لیږي.
ــ د نړیوال کنوانسیون متن برابر او وژباړل شي؛ ځکه ټول هغه هېوادونه چې د کاپي رایټ قانون لري، دغه قانون یې د همدغه کنوانسیون په بنسټ جوړ کړی دی.
ــ په بله ناسته کې به د دغه کمېټې ټول غړي راټولیږي او د کاپي رایټ قانون په اصلاحي طرحه بحث پیل شي.
ــ هغه ټولنیز قشرونه چې د کاپي رایټ قانون سره سروکار لري؛ مګر تراوسه یې استازي په دغه کمېټه کې نه دي شامل شوي، د کمېټې په نورو ناستو کې راوبلل شي.
له یادې ناستې وړاندې په هغه اړیکه کې چې د اطلاعات او کلتور وزارت له حقوقي مشاوریت سره نیول شوې وه له هغه وزارت څخه غوښتل شوي چې ولې یې د دغه اصلاحي طرحې په جوړولو کې د هغه قشرونو استازي چې دغه قانون د دوی په ګټه او یا هم تاوان تمامیږي، نه دي په جریان کې کړي.
همدارنګه اطلاعات او کلتور وزارت هم موافقت ښودلی دی چې هغه بنسټونه او ټولنیز قشرونه کولای شي اوس خپل نظریات راټول او د دغه طرحې د ښې اصلاح لپاره وړاندې کړي.
په داسې حال کې چې په تشکیل شوې کمېټه کې د کاپي رایټ قانون د اصلاحي طرحې د برسي لپاره د دا ډول بنسټونو استازي ګډون لري، نږدې ده په راتلونکو ناستو کې د نورو قشرونو استازي چې له دغه قانون سره سرو کار لري راوبلل شي.
