په خوست ولایت کې د سولې پیغام رادیو مسوولین وایي چې دوې وړځې وړاندې سخت طوفان دغه رادیو ته ډېر زیان اړولی دی.
د سولې پیغام رادیو مسوول او د افغانستان د ژورنالیستانو ملي اتحادیې د عالي شورا غړی، زاهد شاه انګار وایي: طوفان زموږ د رادیو وسایلو ته سخت زیان اړولی دی.
د انګار په وینا، لیږدوونکي آنتنونه، لمیز برېښنایي سیستم، د انټرنېټ انتنونه او د یادې رایو یو شمېر نور تخنیکي وسایل له منځه تللي او یا یې هم سخت زیان لیدلی دی.
اوس مهال د یادې رادیو نشرات درېدلي دي او د رادیو مسوولین د ژوبل شوو وسایلو په جوړولو بوخت دي. د سولې پیغام رادیو مسوول، زاهد شاه انګار په هغه پیغام کې چې د افغانستان د ژورنالیستانو ملي اتحادیې ته یې رالېږلی دی، د رسنیو له ملي او نړیوالو ملاتړو بنسټونو یې غوښتي ترڅو د رادیو د بیا فعالولو لپاره له دوی سره همکاري وکړي.
