د پژواک خبري آژانس خبریال، عزیزالله همدرد د شنبې په شپه د وسلوالو کسانو له برید لاندې راغی او ټپي شو.
همدرد په داسې حال کې چې د کابل په پنځه لسمه حوزه(خواجه بغرا) کې د کور په لور روان وو د وسلوالو کسانو له لوري پرې برید وشو. د پژواک خبري آژانس د راپور په اساس دغه برید د شنبې په شپه شاوخوا ۹ بجې رامنځته شوی دی.
د همدرد په وینا دوه تنو وسلوالو کسانو د نوموړي کورته نږدې د ده د راتلو انتظار ایسته او همدا چې له دوی سره مخ شو هغوی په ده برید کړی او په چپه اوږه یې ټپي کړی دی. د همدر روغتیایي حالت ښه بلل شوی دی. نوموړی اوس مهال د کابل په(ایمرجنسي) روغتون کې بستر دی.
د کابل پولیسو ویلي چې د دغه برید په اړه به څېړنې وکړي؛ مګر تراوسه د دغه قضیې عاملینو د هویت په اړه یې څه نه دي ترلاسه کړي.
د افغانستان د ژورنایستانو ملي اتحادیې د کال له امنیه قومندان سره په اړیکه کې د یادې قضیې د جدي څېړلو غوښتنه کړې ده. مسوولینو ژمنه کړې چې په دې اړه په جدي ډول څېړنې کوي.
