پلوشه ټوخي تېره ورځ په مزار شریف کې په قتل ورسېده. ویل کیږي چې نامعلوم وسلوال کسان د ټوخي کور ته د ننه شوي او په هغې یې د چاقو په وسیله برید وکړ، آغلې ټوخي روغتون ته له رسېدو وروسته خپل ځان له لاسه ورکړی دی.
د آغلې ټوخي کورنۍ ویلي دي چې د دغه قتل په علت نه پوهیږي او له چا سره شخصي دښمني هم نه لري. په مزار شریف کې د امنیتي مسوولینو په وینا، هغوی دا قضیه تعقیبوي. د بلخ پولیسو ویلي دي تراوسه یې د دغه قتل د عواملو کومه نښه یې نه ده لاس ته راغلې.
د بلخ د والي ویاند، منیر فرهاد خبریالانو ته ویلي دي چې د دغه قضیې په اړه جدي څېړنې روانې دي. نږدې دوې میاشتې وړاندې د لحظې راډیو خبریال، خالد آګاه هم په مزار ښار کې په قتل ورسېده. د رسنیو ملاتړي بنسټونه له دغه پېښو په اندېښنې ښودلو سره امنیتي بنسټونه د خبریالانو د امنیت په نه تامینولو کې ملامت ګڼي. په بلخ کې د افغانستان د ژورنالیستانو ملي اتحادیې مسوولین وایي چې د دغه قضیې د څېړلو په اړه له امنیتي بنسټونو سره په اړیکه کې دي.
