د تېرې دوشنبې په ورځ د خامه پرس خبري آژانس په خبریال، رویین رهنوش د کابل ښار څلورمه ناحیه کې د وسلوالو کسانو له لوري برید وشو.
د هغه اعلامیې په اساس چې خامه پرس په دې اړه خپره کړه، ښاغلی رهنوش په داسې حال کې چې له دفتر څخه د خپل کور په لور روان وو په څلورمه ناحیه کې د مېوې مارکېټ ته څېرمه د څلور وسلوالو کسانو له لوري پرې برید وشو او په چاقو سره ټپي شوی دی.
د خامه پرس د امتیازونو څښتن، خشنود نبي زاده ویلي دي، تراوسه معلوم شوي نه دي چې ولي په ښاغلي رهنوش برید شوی دی. رویین رهنوش په یوه تلیفوني اړیکه کې د افغانستان د ژورنالیستانو ملي اتحادیې وویل چې ټپونه یې جدي نه دي.
د رهنوش په وینا، قضیه د پولیسو څلورمې امنیتي حوزې سره شریکه شوې ده مګر تراوسه د برید کوونکو په اړه څه نه دي لاس ته ورغلي. د کابل د پولیسو چارواکي وایي چې هغوی د بریدګرو د معلومولو په لټه کې دي.
