مولاداد یعقوبي چې په هرات ولایت کې یې د آریانا تلویزیون او پژواک خبري آژانس لپاره کار کوي، له څو اونیو راپه دې خوا سخت ناروغ دی او اوس مهال د درملنې لپاره هندوستان ته تللی دی.
د ښاغلي یعقوبي د همکارانو په وینا، د نوموړي ناروغي ډېره خطرناکه او د علاج وړ نه ده او له بل لوري هم د ښاغلي یعقوبي د کورنۍ مالي حالت ښه نه دی او د نوموړي د درملنې توان نه لري.
په همدې حال د ښاغلي یعقوبي یو شمېر هم مسلکانو په هرات ولایت کې د هرات د رسنیزو بنسټونو ګډې کمېټې په همکارۍ جاوېد زیار نجابي د افغانستان له خبرالانو د ملاتر مرکز مسوول، په هرات کې د آریانا تلویزیون مسوول فواد احمدي، د هېواد په لویدیځ کې د افغانستان د خبریالانو خوندیتوب کمېټې مسوول، په هرات کې د افغانستان د ژورنالیستانو ملي اتحادیې مسوول، قدیر شاهین او څو تنو نورو خبریالانو په تېرو ورځو کې د ښاغلي یعقوبي د درملنې لپاره د مرستو په راټولولو کې هڅې کړې دي.
په هرات کې د افغانستان د ژورنالیستانو ملي اتحاديې مسوول، قدیر شاهین وایي چې تراوسه یې د یعقوبي د درملنې لپاره ۸۵۰۰ ډالر ټول کړي دي چې دا پیسې د دوشنبې په ورځ د اریانا تلویزیون په ولایتي دفتر کې د یعقوبي کورنۍ ته سپارل شوي دي.
د هرات ولایت مقام، په پارلمان کې د هرات یو شمېر استازي، یو شمېر تجاران، د هرات دولتي ادارو یو شمېر مسوولین او یو شمېر خبریالان له دغه مرسته کوونکو څخه وو. د افغانستان د ژورنالیستانو ملي اتحادیه په داسې حال کې چې د ښاغلي یعقوبي له ملاتړ څخه ملاتړ کوي، هڅه کوي ترڅو په دې اړه د خیر له کسانو سره اړیکه ونیسي.
د افغانستان د ژورنالیستانو ملي اتحادیې اجرایه رییس، فهیم دشتي وایی: د خپل همکار څخه د ملاتړ لپاره زمونږ د هم مسلکانو هڅې، انساني حقونو او د خبریالۍ حرفې ته د ژمنې یوه نمونه ده. دشتي له ټولو هغو کسانو چې غواړي په دې تړاو مرسته وکړي، غواړي چې په هرات کې د افغانستان د ژورنالیستانو ملي اتحادیې له دفتر سره اړیکه ونیسي.
