په خوست کې د ژمن تلویزیون په خبریال، سلطان محمود خیرخواه نن سهار برید شوی چې د ژورو ټپونو له امله یې له دې نړۍ څخه سترګې پټې کړې.
په خیرخوا باندې نن سهار د نامعلومو کسانو له لوري برید شوی او په سر باندې سخت ټپي شوی وو.
که څه هم د خبریالانو صنفي او ملاتړو بنسټونو او مسوولو دولتي چارواکو هڅه وکړه ترڅو خیرخواه د تداوۍ لپاره کابل ته ولېږدوي؛ مګر د نوموړي روغتیایي حالت د دې سبب شو چې ډاکټران یې کابل ته د لېږدولو مشوره ورنه کړي.
په خوست کې سیمه ییزو چارواکو ویلي چې د دې قضیې په اړه یې څېړنې پیل کړي دي؛ مګر تراوسه یې په دې اړه څه نه دي ترلاسه کړي.
همدا راز په کابل کې د کورنیو چارو وزارت چارواکي وایي چې دا قضیه به جدي وڅیړي.
د خبریالانو صنفي او ملاتړو بنسټونو د خیرخواه د قاتلینو د نیولو غوښتنه کړې او له دولت یې غوښتي چې په جدي توګه دغه قضیې ته رسیدګي وکړي.
د افغانستان د ژورنالیستانو ملي اتحادیې رییس، فهیم دشتي وایي: ښکاره ده چې ښاغلی خیرخواه په قصدي ډول هدف ګرځېدلی او موږ هیله لرو چې اړوند دولتي بنسټونه ژر تر ژره د نوموړي د قتل عاملین وپېژني او د قانون منګولو ته وسپاري.
د دشتي په وینا، د افغانستان د ژورنالیستانو ملي اتحادیه او د افغانستان د ژورنالیستانو او رسنیزو بنسټونو په فدراسیون کې نور شامل بنسټونه د دغه قضیې په تړاو د حکومت له اقداماتو څخه له نږدې نظارت وکړي ترڅو وروستۍ پایلې ترلاسه شي.
