د خبریالانو د ملاتړ صندوق له مستحقو خبریالانو سره د مالي مرستو په دوام، نن له یوه ټپي خبریال سره مرسته وکړه.
د سباوون خصوصي تلویزیون خبریال، نثاراحمد احمدي چې په هلمند کې فعالیت کوي، له دوو میاشتو راپه دې خوا تر درملنې لاندې دی.
احمدي وروسته له هغه چې په موټر کې چسپکي ماین پرې چاودنه وکړه، په دواړو پښو سخت ټپي شو چې د ژورنالیستانو او رسنیزو بنسټونو د فدراسیون او امنیتي بنسټونو په هڅو د درملنې لپاره کابل ته انتقال شو او د سردار محمد داوود خان په روغتون کې تر درملنې لاندې شو.
له کله چې ولسمشر غني له خپل شخصي حساب څخه د خبریالانو د ملاتړ له صندوق سره مرسته وکړه، نثار احمد شلم خبریال دی چې مالي مرسته ورسره کیږي.
د ملاتړ صندوق د طرزالعمل پر بنسټ، هغه خبریالان چې د حرفوي کار په جریان کې ټپي شي او یا هم په نا علاجه ناروغۍ اخته دي، کولای شي چې له صندوق څخه د مرستې غوښتنه وکړي او په هغه صورت کې چې غوښتنه یې مستند وي او د کومک د ترلاسه کولو لپاره د اړتیا د ثابتولو لپاره کافي اسناد ولري، مالي مرسته ترلاسه کولای شي.
