په ننګرهار کې د یوې سیمه ایزې رادیو خبریال، عمران لمر چې دوې اونۍ وړاندې ټپي شوی وو، د خبریالانو د ملاتړ صندوق له لوري ورسره مرسته وشوه.
په عمران لمر په جلال آباد ښار کې د نامعلومو کسانو له لوري برید شوی وو او سخت ټپي شوي وو، د خبریالانو او رسنیزو بنسټونو د فدراسیون په هڅو او د دولتي بنسټونو په همکارۍ کابل ته انتقال شوی او په یوه مجهز روغتون کې تر درملنې لاندې دی.
ډاکټران وایي چې عمران په وخت سره کابل ته نه وو انتقال شوی روغتیایي حالت یې د اندېښنې وړ وو. د دوی په وینا اوس د عمران لمر روغتیایي حالت ښه دی او ډېر ژر به له روغتون څخه مرخص شي.
د خبریالانو د ملاتړ صندوق، د خبریالانو سره د مرستې د طرزالعمل په بنسټ له عمران لمر سره مالي مرسته کړې ده.
د یاد بنسټ مسوولین وایي مستحق خبریالان په هغه صورت کې چې مستند اسناد وړاندې کړي، د مالي مرستې مستحق ګڼل کیږي.
له دې وړاندې هم زیات شمېر مستحقو خبریالانو له یاد صندوق څخه مالي مرسته ترلاسه کړې ده.
