د تخار خبریالان او په یاد ولایت کې د خبریالانو د حقونو مدافع بنسټونو په تخار کې د افغانستان د ژورنالیستانو ملي اتحادیې په ولایتي دفتر کې د یوې اعتراضي ناستې په ترځ کې د تخار ولایت له خبریالانو څخه د یاد ولایت د امنیه قومندان له لوري د بښنې غوښتلو غوښتونکي شول.
دغه خبریالانو د تخار د امنیه قومندان له لوري د سلام وطندار رادیو او خورشید تلویزیون له خبریالانو سره زشت او سپک چلند او تهدید وغنده. خبریالانو په دغه ناسته کې د خبریالۍ له حقونو د دفاع بنسټونو او د کورنیو چارو له وزارت وغوښتل ترڅو د غیر قانوني کړنو، په رسنیز کار د محدویت وضع کولو، تهدید او د تخار د امنیه قومندان له لوري د خبریالانو پر وړاندې د دوسیو جوړولو مخه ونیسي.
دا په داسې حال کې ده چې دوې ورځې وړاندې د تخار امنیه قومندان، حشمت مسلم د سلام وطندار رادیو خبریال، عرفان برزګر او د خورشید تلویزیون خبریال، شفیق پویا خپل کاري دفتر ته غوښتي وو او تهدید کړي یې وو، چې د تخار له امنیتي ستونزو او پېښو څخه راپور جوړ نه کړي. د راپور جوړولو په صورت کې هغوی ته دوسیه جوړوي او نیسي یې.
د افغانستان د ژورنالیستانو ملي اتحادیې د خبریالانو پروړاندې د تخار د امنیه قومندان دغه کړنه غیر قانوني بللې او هیله لري چې د کورنیو چارو وزارت په دې اړه قانوني او لازمه رسیدګي وکړي.
