تېره شپه، په کابل کې د سیاسي چارو شنونکی وحید مژده کورته نږدې ترور شو.
له دې پېښې یوه ورځ وړاندې، په آزاد خبریال زبیر بابکرخېل سره له یوه خارجي همکار د کابل په سروبي سیمه کې وسلوال برید شوی وو چې له پېښې روغ وتلي دي.
د سروبي له پېښې یوه ورځ وړاندې په هرات کې د آزادۍ رادیو همکارغیاث الدین علیزاده له دې نړۍ سترګې پټې کړې.
دغه پېښو د افغانستان د رسنیو کور ولړزاوه او په داسې حال کې چې تراوسه پورې په وحید مژده او بابکرخېل د شویو بریدونو عامل نه دی په ډاګه شوی، د کورنیو چارو وزارت چارواکي وایي چې په دې اړه یې پلټنې پیل کړي دي.
د افغانستان د ژورنالیستانو ملي اتحادیې رییس، فهیم دشتي وایي: دواړې پېښې د خبریالانو پروړاندې، د تاوتریخوالي څېړلو له کمېټې سره شریکې شوي دي او د افغانستان د ژورنالیستانو او رسنیزو بنسټونو د فدراسیون له لوري څېړل کیږي.
د خبریالانو پروړاندې د تاوتریخوالي د څېړلو کمېټه چې په دریو وروستیو کلونو کې فعاله شوې ده او په دې کې د ملي امنیت ریاست، لویې څارنوالۍ او فدراسیون استازي د کورنیو چارو وزارت د جنایي جرمونو پر وړاندې د مبارزې ریاست تر مشرې لاندې ګډون لري. د خبریالانو پروړاندې د تاوتریخوالي نږدې ۱۳۵۰ قضیې چې د ۲۰۰۱ څخه تر ۲۰۱۸ کال پورې رامنځته شوي څیړل شوي دي.
د یادې کمېټې د راپور پر بنسټ، په دوو وروستیو میاشتو کې د خبریالانو پروړاندې د تاوتریخوالي ۲۳ پېښې رامنځته شوي دي، چې له دې جملې د ۲۰ قضیو په مورد څېړنې پای ته رسېدلي دي او درې نورې قضیې عدلي او قضایي بنسټونو ته لیږل شوي دي.
