په بامیانو ولایت کې د بیان آزادۍ د محدودیت په تړاو د افغانستان د ژورنالیستانو ملي اتحادیې له اعلامیې خپرولو وروسته، د یاد ولایت سیمه ییزې ادارې مثبت غبرګون وښود.
د ۱۳۹۸ لمریز کال د لیندۍ په ۷ نېټه د پنجشنبې ورځې په اداري ناسته کې د بامیانو والي، محمد طاهر زهیر ټولو دولتي مسوولینو ته امر کړی چې معلومات د خبریالانو او رسنیو په واک کې ورکړي.
ښاغلي زهیر په دې ناسته کې وویل چې اطلاعاتو ته د لاسرسي قانون پر بنسټ، د دولتي ادارو ټول مسوولین مکلف دي چې له رسنیو سره معلومات شریک او له خبریالانو سره مرکه وکړي.
نږدې ده چې یکشنبه د لیندۍ په ۱۰ مه نېټه، د بامیانو والي محمد طاهر زهیر په مشرۍ د کډې کمېټې له غړو، خبریالانو او دولتي مسوولینوچې د معلومات ورکولو په برخه کې یې بې پروایي کړې ده، یوه فوق العاده ناسته ترسه شي.
په بامیان ولایت کې د افغانستان د ژورنالیستانو ملي اتحادیې د ولایتي دفتر مسوول، اسحق اکرمي په وخت سره د دولتي ادارې د کړنې هرکلی کړی او تمه لري چې په لنډه موده کې دغه ستونزه حل شي او ټولې دولتي ادارې خبریالانو ته په معلومات ورکولو مکلفې شي.
د خبریالانو میاشتینۍ ناسته چې تېره اونۍ په بامیانو کې د افغانستان د ژورنالیستانو ملي اتحادیې په ولایتي دفتر کې ترسره شوه، ژورنالیستانو له دولتي ادارو(د ولایت مقام، د ولایت د مطبوعاتو څانګه، د معدن ریاستونو، څارنوالۍ، محکمې، بریښنا، ولایتي روغتون او د بامیانو امنیه قومندانۍ ….) شکایت او اندېښنه څرګنده کړې وه چې په تېره یوه میاشت کې یې معلومات د رسنیو او خبریالانو په واک کې نه دي ورکړي.
د اساسي قانون، د ټولیزو رسنیو قانون، اطلاعاتو ته د لاسرسي قانون او د ولسمشر د فرمان پر بنسټ، ټولې دولتي ادارې مکلفې دي چې معلومات د ښاروندانو او په ځانګړې توګه د خبریالانو په واک کې ورکړي.
