د عدلیې وزارت له لوري د خصوصي څانګې د تقاعد حقونو د تنظیم مقررې د نافذیدو په اعلام سره، خبریالان او رسنیز کارکوونکي د تقاعد له حقونو څخه برخمن کیږي.
یاده مقرره د افغانستان د ژورنالیستانو او رسنیزو بنسټونو د فدراسیون په وړاندیز او د افغانستان د کارګرانو ملي اتحادیې په همکارۍ، دوه کاله وړاندې طرحه شوه.
په هغو ناستو کې چې د کارګرانو ملي اتحادیې او د فدراسیون استازو د کار او ټولنیزو چارو، اطلاعات او کلتور او عدلیې وزارتونو له چارواکو سره لرې، د یادې مقررې مسوده د تېر کال په اوړي کې وروستۍ شوه؛ مګر د دوامداره څارنې سره یې تصویب او نافذېدل له یوه کال زیات وخت ونیوه.
د افغانستان د ژورنالیستانو ملي اتحادیې رییس او د خبریالانو او رسنیزو بنسټونو فدراسیون د رهبرۍ غړی، فهیم دشتي وایي: تراوسه دا مقرره موږ ته نه ده رسېدلې؛ خو تمه لرو، چې د تصویب په وخت کې په هغې کې کوم تغیرات نه وي راوړل شوي.
د دشتي په وینا، په هغه صورت کې چې نافه شوې مقرره د هغې له وروستۍ مسودې سره فرق ونه لري، یاده مقرره کولی شي د خبریالانو او رسنیزو کارکوونکو ترڅنګ د خصوصي څانګې د ټولو کارکوونکو د تقاعد حق فراهم کړي.
له دې وړاندې، د خبریالانو او رسنیزو کارکوونکو په ګډون د خصوصي څانګې کارکوونکي د قانوني بنسټ د نشتون له امله د تقاعد له حق څخه برخمن نه وو.
