په غزني ولایت کې له خبریالانو سره د سیمه ییزو مسوولینو د نه همکارۍ او په وخت سره د معلوماتو د نه شریکولو له امله خبریالانو د دولت اړوند ټول خبرونه تحریم کړي دي.
دا پرېکړه له هغه وروسته وشوه کله چې د غزني د سیمه ییزو اداراتو ویاندویانو په ځانګړې توګه د ولایت مقام له خبریالانو سره کم معلومات شریکول. دا په داسې حال کې ده چې یوه اونۍ وړاندې د یاد ولایت قره باغ ولسوالۍ کې د ملي اردو په قرارګاه د طالبانو برید په وخت کې د غزني د چارواکو په امر د ولایت مقام ته امنیتي ځواکونو د خبریالانو د ورتلو مخه نیولې وه.
اطلاعاتو ته لاسرسی، د قانون له نظره د دې هېواد د خلکو او رسنیو مسلم حق دی. مګر له بده مرغه په زیاتره مواردو کې دولتي بنسټونه اطلاعاتو ته د رسنیو او وګړو لاسرسي مخه نیسي.
د افغانستان د ژورنالیستانو ملي اتحادیه په مرکز او غزني کې له دولتي بنسټونو غواړي چې دې ستونزې ته رسیدګي وکړي. ترڅو دغه ستونزه په دې ولایت کې د بیان آزادۍ د محدودیت باعث نه شي.
