په تېرو کلونو کې، نړیوالو بنسټونو او د افغانستان رسنیو له لوري د جګړې په راپور ورکولو زیاته پانګه اچونه شوې او د افغانستان رسنیو په دې برخه کې د پام وړ پرمختګ کړی دی؛ خو نن اړتیا ده چې د سولې راپور ورکولو په برخه کې د رسنیو او خبریالانو ظرفیت ته پام وشي.
اوس مهال، خلک له هغه خبرونو څخه ستړي شوي چې جګړه او تاوتریخوالی پوښښ کوي چې ترڅنګ یې دغه خبرونه د دوی په روان بده اغېزه ښندي. په داسې حالت کې رسنۍ د سولې راپور ورکولو څخه په ګټه اخیستنې سره کولی شي زیات شمېر لیدونکي او اوریدونکي ځانته را جلب کړي چې له یو لوري په آزاد بازار کې د رسنیو له پاره د مخاطبینو جلب د زیات باور ترلاسه کولولو په مانا دی او له بل لوري یوه باوري رسنۍ په آسانۍ سره کولی شي د سولې غوښتلو او د سولې لپاره د هڅې په برخه کې د ټولنې ذهنیت تغیر کړي.
د افغانستان د ژورنالیستانو ملي اتحادیې او په افغانستان کې له ښځینه خبریالانو څخه د ملاتړ مرکز د دې اړتیا په درک کولو سره، د سولې راپور ورکولو په تړاو لاس لیک چمتو کړی دی او له دې لارې هڅه کوي په افغانستان کې د رسنیو او خبریالانو ترمنځ د سولې راپور ورکولو فرهنګ رواج کړي.
یاد لاس لیک په دري او پښتو ژبو چاپ شوی او په نږدې وخت کې به د افغانستان په ټولو ولایتونو کې په خبریالانو ووېشل شي. همدارنګه په پام کې ده چې د همدې لاس لیک د محتوا پر بنسټ د افغانستان په زیات شمېر ولایتونو کې د خبریالانو لپاره زده کړیز پروګرامونه جوړ شي.
کولای شئ چې د دغه لاس لیک سافټ له لاندې لینک څخه ترلاسه کړئ.
