نن شنبه د سولې راپور ورکولو تر سرلیک لاندې یو ورځینی زده کړیز پروګرام چې د ملي او نړیوالو رسنیو په لسګونو خبریالانو پکې ګډون کړی وو پای ته ورسېد.
په دغه ورکشاپ کې چې د افغانستان د ژورنالیستانو ملي اتحادیې او په افغانستان کې له ښځینه خبریالانو څخه د ملاتړ مرکز له لوري جوړ شوی وو د سولې راپور ورکولو، د سولې په راپور ورکولو کې ځانګړو موضوع ګانو، د سولې راپور ورکولو پېژندل، له منازعې سره حساس راپور ورکولو، د منازعې پایلو، د تاوتریخوالي پېژندل، د منازعې تحلیل، د رسنیو توان، د سولې خبریالۍ لپاره تګلارې، رسنۍ او د سولې رامنځته کول او د سولې راپور ورکولو اړوند موارد له خبریالانو سره شریک شول.
په تېرو کلونو کې، د نړیوالو بنسټونو او د افغانستان رسنیو له لوري د جګړې په راپور ورکولو زیاته پانګه اچونه شوې ده او د افغانستان رسنیو په دې برخه کې د پام وړ پرمختګ کړی دی؛ خو نن اړتیا ده چې د سولې راپور ورکولو په برخه کې د رسنیو او خبریالانو ظرفیت ته پام وشي.
له همدې امله د افغانستان د ژورنالیستانو ملي اتحادیې او په افغانستان کې له ښځینه خبریالانو څخه د ملاتړ مرکز د دې اړتیا په درک کولو سره، د سولې راپور ورکولو په تړاو لاس لیک چمتو کړی دی او له دې لارې هڅه کوي په افغانستان کې د رسنیو او خبریالانو ترمنځ د سولې راپور ورکولو فرهنګ رواج کړي.
د همدغه لاس لیک د محتوا پر بنسټ د افغانستان د ژورنالیستانو ملي اتحادیې او په افغانستان کې له ښځینه خبریالانو څخه د ملاتړ مرکز، په مرکز او ولایتونو کې زده کړیز پروګرامونه په لاره اچولي دي، چې ننی پروګرام د دغه زده ګړیزو پروګرامونو د لړۍ پیل وو.
