دغه لارښود د کووېډ- ۱۹ ناروغۍ اړوند موضوعاتو په تړاو د خبریالانو لپاره چمتو شوی دی. په دغه لارښود کې د کووېډ- ۱۹ ویروس اړوند ستراتېژۍ، وسایلو، تکنیکونو او سرچینو په اړه خبریالانو ته معلومات چمتو شوي. په دغو موضوعاتو کې د دې ناورغۍ د پېژندلو په اړوندو وسایلو بحث شوی چې د ناسم پوهاوي او ذهني انحرافاتو مخنیوی وشي.
د کرونا (کووید-19) ویروس د خبر له خپرېدو او جدي کېدو وروسته د راپور جوړوونکو لپاره اړینه ده چې په دې اړه خپلو مخاطبینو ته دقیق او سم خبرونه وړاندې کړي، جعلي خبرونه تفکیک کړي او دقیق، ارزښتناک، حساس او د منلو وړ خبرونه اورېدونکو ته ورسوي. د کروناویروس د خپرېدو او د دغه ویروس پر وړاندې د تدابیرو اړوند نیمګړي او جعلي خبرونه تر بل هر وخت ډېر شوي دي. خلک غواړي چې له دغه ویروس څخه د ځان ساتنه وکړي او په دې اړه ډېری وخت ناسم او له شایعاتو ډک خبرونه خپرېږي چې تر ډېره په ټولنه کې دا ډول ناسم او جعلي خبرونه منل شوي هم دي.
له همدې کبله اوسمهال د کووېډ- ۱۹ ویروس اړوندو خبرونو پوښښ له ستونزو سره مخ دی؛ ځکه چې ژورنالیستان له یوې داسې نړیوالې وبا (Pandemic) سره مخ دی، چې ډېری اړخونه یې لاهم ګونګ دي او ځینې وختونه په نړۍ کې د دغه کړکېچ پر وړاندې غیرمنطقي پرېکړې کېږي.
په همدې خاطر د افغانستان د ژورنالیستانو ملي اتحادیې لارښود چمتو کړ ترڅو له دغه لارښود څخه په ګټې اخیستنې سره زموږ خبریالان او رسنۍ وکولی شي خلکو ته د عامه پوهاوي په لارکې مسلکي او تخصصي چلند ولري.
