په هرات کې یوه سیمییز خبریال حشمت الله یزدان پناه، نن سهار کله یې چې غوښتل د هرات ولایت ودانۍ ته د یوه خبري کنفرانس لپاره ننوزي، له توهین او بد چلند سره مخامخ او د هرات والي د دفتر له دروازې وشړل شو.
ښاغلی یزدان پناه وایي: هغه سربېره پر دې چې د خبریالۍ کارت هم ورسره وو، کله یې چې په خپل مبایل سره د نوموړي ولایت د ودانۍ له مخې تصویر اخیسته، د پولیسو يوه سرتېري په نوموړي برید وکړ، په مخ باندې د څپېړې او په ملا له سوک وهلو وروسته د ټوپک د میل په واسطه یې پر لاس هم زخمي کړ.
دی ټینکار کوي چې وروسته له دې پېښې، نوموړي سرتېري هغه په سپکاوي سره د ولایت له ودانۍ بهر کړی او بېرته یې د نورو سرتېرو په مداخله په نوموړي کنفرانس کې ګډون کړی دی.
نوموړی خبریال د هرات د والي د دفتر د ساتونکي دغه چلند سپکاوی بللی، له دولت او د خبریالانو د ملاتړ کوونکو بنسټونو څخه غواړي ترڅو د دې ډول پېښو څېړنه وکړي.
په همدې حال کې د هرات د ژورنالیستانو د ملي اتحادیې د دفتر مسوول قدیر شاهین وایې، پدې پېښه له خبرېدو ورسته، د څو تنو همکارانو په همکارۍ مو نوموړې موضوع د هرات د پولیسو له قومندان ایوب انصاري سره شریکه کړه.
د شاهین په وینا د هرات د پولیسو قومندان امر ورکړی وو تر څو دغه کس ونیول شي، اوس مهال د پولیسو نوموړی سرتېری نیول شوی دی.
هغه زیاته کړه، نوموړی سرتېری عبدالله نومېږي د ملي پولیسو د لومړۍ حوزې مربوط د لومړي قراول قومندان دی. او اوس مهال موضوع تر څېړنې لاندې ده.
او د ښاغلي حشمت یزدان پناه روغتیایي حالت د اندېښنې وړ ندی.
