په هغه ځانمرګي برید کې چې نن وروسته له غرمې د قصرنوین تالار مخې ته وشو یو خبریال او یو فلمبردار ټپي شول.
پېښه هغه وخت رامېنځ ته شوه، چې د بلخ والي عطا محمد نور په ملاتړ جوړه شوې غونډه پای ته ورسېده اود غونډې ګډونوال له ودانۍ د وتلو په حال کې وو.
په پېښه کې د راه فردا تلوېزون خبریال تقي سدید او فلمبردار حسین نظري ټپي شول، د راه فردا تلوېزون د مسوولینو په وینا د ټپیانو روغتیایي حالت د اندېښنې وړندی.
د افغانستان د ژورنالیستانو د ملي اتحادیې مسوولینو په هېواد کې د رسنیو فعالیت د پېښو ډک چاپېریال په اشاره ویلي، خبریالانو د خبررسولو په لومړۍ کرښه کې زیاتې قربانۍ ورکړې دي، او اوس هم همدغه حالت له دوی قرباني اخلي.
د نوموړې اتحادیې رییس فهیم دشتي وایي ( بدبختانه یو وار بیا زمونږ همکاران د ترهګریزو بریدونو قرباني شول. اما مونږ پر دې پوره باور لرو چې رسنۍ او خبریالان د خبر رسولو لپاره پوره ژمن دي، او دا رکم پېښې به دوۍ له خپل مسوولیت غافله نکړي).
د امنیتي مسوولانو په وینا د نن ورځې په ځانمرګي برید کې ۱۳ تنه په شهادت رسېدلي او نژدې شل کسه ټپیان دي.
