په هرات کې د خبریالانو د حامي بنسټونو مسوولینو، نن په یوه ګډ خبري کنفرانس کې د یاد ولایت د خبریالانو او رسنیو له امنیتي حالت څخه اندېښنه ښکاره کړه.
هغوی همدارنګه د خورشید تلویزیون پر دفتر، د افغانستان د ژورنالیستانو په ملي اتحادیې او په هرات کې د ښځینه خبریالانو پر بنسټ د برید په اړه، د امنیتي ځواکونو په کارکرد نیوکې وکړې او له حکومت او لوړپوړو امنیتي مسوولینو څخه یې د دې مسلې د جدي څېړلو او په هرات کې د خبریالانو د حامي بنسټونو د امنیت د ټینګښت غوښتنه وکړه.
په همدې حال، د هرات د پولیسو قومندان په هرات کې د خبریالانو د حامي بنسټونو له مسوولینو سره په یوه ناسته کې، د ذکر شوو بنسټونو په ولایتي دفترونو برید غندلی، ټینګار یې وکړ، چې د دغه برید په بررسي کولو کې د دریمې امنیتي حوزې پولیس پاتې راغلي او په همدې خاطر یې د دغه حوزې له مامورینو څخه یو تن له وظیفې څخه لرې کړی دی.
په همدې حال په هرات کې د افغانستان د خبریالانو د مز استازي، عبدالقیوم فدرام قاضي زاده همدارنګه په هرات کې د خبریالانو دوامدارو ستونزو ته اشاره وکړه او په هرات کې اطلاعاتو ته د لاس رسي د نشتوالي له بد حالت څخه یې اندېښنه ښکاره کړه.
دا پداسې حال کې ده، چې د خبریالانو د حامي بنسټونو مسوولین وایي، د مېلادې کال له لومړیو څخه تر اوسه د خبریالانو پر وړاندې د تاوتریخوالي ۱۸ موارده تنها د هېواد په لویدیځو ولایاتو کې رامنځته شوي دي.
همدارنګه د هرات ولایت د خپلو ځانونو او د رسنیزو مرکزونو د امنیت په ټینګښت ټینګار کوي او له حکومت څخه د بیان د آزادۍ په لار کې د فعالیتونو د دوام پخاطر د رسنیو او خبریالانو د امنیت په ټینګښت کې د شوو ژمنو په عملي کولو ټینګار کوي.
