طالبانو د کندز ضصوصي رادیو ودانۍ سوځولې او د یادې رادیو وسایل او تجهیزات یې تخریب کړي او یایې هم لوټ کړي دي.
د کندز رادیویي شبکې مسوول، هدایت الله زیارمل وایي: نوموړې رادیو په کندز ښار کې د افغانستان د کلتور او رسنیو بنسټ په ودانۍ کې فعالیت کاوه او طالبانو هم د دغه بسټ مربوطه خونې او هم یې د کندز رادیو خونې سوځولې دي.
د زیارمل په وینا، د طالبانو په لاس د کندز د نیولو په لومړۍ ورځ، د دغه رایو نشرات بند شوي وو، مګر دوې ورځې وړاندې د دغه رادیو ودانۍ وسوځول شوې ده او وسایل او تجهیزات یې تخریب شوي او یا هم لوټ شوي دي.
له دې وړاندې، په کندز ښار باندې د طالبانو د برید په لومړۍ ورځ هم د روشني خصوصي رادیو تلویزیون او د کندز د ملي رادیو تلویزیون ودانۍ د دوی له لوري سوځول شوې وې او د هغوی وسایل او تجهیزات تخریب او یا هم لوټ شوي.
د افغانستان د ژورنالیستانو ملي اتحادیې په کندز کې په رسنیو د برید اندېښنه اعلام کړې ده. د یادې اتحادیې مسوولین وایي، هڅه کوي ترڅو په کندز کې د حالت تر ښه کېدو پورې، د دې مواردو په اړه هراړخیزې څېړنې ترسره کړي او د هغه رسنیو د مرستې لپاره اقدام وکړي، کومې چې د ترهګرو په برید کې زیانمنې شوي دي.
