د سه شنبي په ورځ د افغانستان د خبریالانو د ملي اتحادیې رئیس محمد فهیم د شتي کندهار والي تورن جنرال زلمي ویسا سره وکتل.
ښاغلي محمد فهیم دشتي زیاته کړه،چي کندهار ولایت یي د سفر موخه د خبریالانو ستونزو اورېدل او د حل په موخه يي په مرکزي سطحه کار کول دي.
د خبریالانو د ملي اتحادیې رئیس له کندهار والي سره په خبرو کي خبریالانو ته د معلوماتو پر رسولو او دهغوۍ د خوندیتوب اړوند ټینګار وکړ.
وروسته کندهار والي تورن جنرال زلمي ویسا ښاغلي محمد فهیم ته ښه راغلاست ووایه ، او له هغو خبریالانو یې مننه وکړه چې د ژورنالیزم اصولو او په خپل مسلک کې بې پرېتوب ته ژمن پاتې سوي دي.
نوموړي د خبریالانو رول په ټولنه کې ډېر مهم وباله، او په دغه ولایت کي د خبریالانو هڅي او کوښښونه وستایل، د هغه په خبره چي خبریالان په ټول هیواد کي د سر په بیه کار کوي او دخلګو ږغ تر حکومت او د حکومت ږغ تر خلګو پوري رسوي.
کندهار والي تورن جنرال زلمي ویسا په خپلو خبرو کي زیاته کړه،چي ولایتي اداره خبریالانو ته د معلومات ورکولو په برخه کي جدي هڅه کوي،ترڅو خبریالانو ته پر وخت معلومات وکړي.
