د ملي آرمان ورځپاڼې مسوولین وایي، چې رسنیزو سرغړونو او شکایتونو ته د رسېدنې کمیسیون، دغه ورځپاڼّه څارنوالۍ ته ورپېژندلې ده.
څارنوالۍ ته د ملي ارمان د ورځپاڼې دلیل، د هغه خبر خپرول دي کوم چې څو میاشتې وړاندې په دغه ورځپاڼه کې خپور شوی او په هغه کې ویلي شوي وو چې د بدخشان له بند څخه یو زنداني چې له ترهګرو سره د مرستې په تور بندي شوي وو، په زمانت آزاد شوی دی.
د ملي آرمان مسوولین وایي، چې رسنیزو سرغړونو او شکایاتو ته د رسېدنې کمیسیون پرته له دې چې له هغوی څخه پدې اړه معلومات وغواړي او یا هم د ملي آرمان استازی د کمیسیون غونډې ته راوبلي، لیک یې څارنوالۍ ته لېږلی او د دغه خبر د خپرولو په دلیل یې د ورځپاڼې د قانوني څېړنې غوښتنه یې کړې ده.
د رسنیو او بیان آزادۍ مدافع بنسټونو، د رسنیزو سرغړونو او شکایتونو ته د رسېدنې د کمیسیون دغه اقدام او حتا د دغه کمیسیون شتون غیر قانوني ګڼي.
د افغانستان د ژورنالیستانو د ملي اتحادیې اجرایوي رییس، فهیم دشتي وایي: دا چې رسنیزو سرغړونو او شکایتونو ته د رسېدنې د کمیسیون شتون د د ټولیزو رسنیو د قانون پر بنسټ غیر قانوني دی، له دې څخه واضع دی چې د هغه په اړه باندې تبصره وشي.
په وروستۍ میاشت کې، رسنیزو سرغړونو او شکایتونو ته د رسېدنې کمیسیون، څو ځلې خبریالان او رسنۍ څارنوالۍ ته ورپېژندلي، چې دې حالت په هېواد کې رسنۍ او خبریالان اندېښمن کړي دي.
څارنوالۍ ته د ملي آرمان له ورپېژندلو یوه ورځ وړاندې، دغه کمیسیون د خبر یالانو، رسنیزو کارکوونکو او د بیان آزادۍ د مدافع بنسټونو له شدیدو مخالفتونو وروسته، اړ شو ترڅو د پرتو نادري په اړه خپل تصمیم بدل او له نوموړي څخه تور لرې کړي.
