د امریکا غږ آشنا رادیو خبریال، ظفر بامیاني د ځاني ګواښونو له کبله، په بامیانو ولایت کې خپل کاري ځای خوشی کړی دی.
د بامیاني په وینا د ده پروړاندې ګواښونه هغه وخت مخ پر زیاتېدو شول، چې د حکیم شجاعي پر اړه یې راپور خپور کړ.
بامیانی وایي، چې راپور یې په واشنګټن کې د یوې رادیو د مسوول اکمل داوي له لوري تحریف شوی دی.
ظفر بامیاني چې اوس مهال په کابل کې دی، وایي هڅه کوي ترڅو دا په ډاکه کړې چې په هغه راپور کې چې نوموړي جوړ کړی وا، له حرفوي لحاظه هېڅ عیب نه لري او که په هغه راپور کې د شجاعي په اړه تور ځای کړل شوی وي، په هغه راپور کې به د لاس وهلو په دلیل وي.
بامیاني د خبریالانو د حقونو له مدافع بنسټونو غوښتي، ترڅو د هغه د حقانیت په ثابتولو کې له نوموړي سره مرسته وکړي.
د افغانستان د ژورنالیستانو د ملي اتحادیې اجرایوي رییس، فهیم دشتي وايي: هغه سندونه او چې ښاغلي بامیاني دې اتحادیې ته په واک کې ورکړي دي، دا په ډاګه کوي چې د ده له لوري برابر شوی راپور په پوره ډول په حرفوي معیارونو برابر دی.
د دشتي په وینا، د افغانستان د ژورنالیستانو ملي اتحادیه هڅه کوي، په هر ډول چې ممکن وي د بیان آزادۍ او خبریالانو د مدافع ملي او نړیوالو بنسټو په همکارۍ، ژر تر ژره دا ستونزه حل کړي.
