د هېواد لویې څارنوالۍ د هشت صبح ورځپاڼې له مسولینو غوښتي، چژ له دغه ورځپاڼې څخه د یوه خپور شوي راپور په اړه ځواب ووایي.
د هشت صبح ورځپاڼې د مسوولینو په وینا په دغه تحقیقي راپور کې په سلګونو رسمي سندونو باندي تحقیق شوی چې له مختلفو دولتي بنسټونو څخه په لاس راغلي دي، د معادن وزارت یو شمېر چارواکي په پراخ اداري فساد او د هېواد د معادنو د ایستلو له تړونونو څخه په ناوړه ګټه اخیستنې تورن شوي دي.
د لویې څارنوالۍ یوه تن څارنوال چې ویې نه غوښتل نوم یې په ډاګه شي، تایید کړه چې د هشت صبح ورځپاڼې مسولین د څارنوالۍ له لوري د دې راپور په اړه د ځواب ویلو لپاره غوښتل شوي دي.
د یاد څارنوال په وینا، د هشت صبح ورځپاڼې مسوولین د یاد راپور په اړه د ځواب ویلو لپاره څارنوالۍ ته رابلل شوي دي؛ مګر همدغه سرچینه وایي چې تراوسه پورې هغه تورونه چې د دغه ورځپاڼې په خپاره شوي راپور کې پر معادن وزارت باندې لګول شوي دي، ندي څېړل شوي.
د هشت صبح ورځپاڼې مسوولین وایي، چې د دغه راپور د محتوا په اړه ځواب ویلو ته حاضرېږي؛ مګر دا ځواب وینه باید په قانوني توګه ترسره شي.
د بیان آزادۍ او رسنیو ملاتړي بنسټونه له هشت صبح ورځپاڼې سره دغه چلند یو اړخیز او غیر قانوني بولي.
د افغانستان د ژورنالیستانو د ملي اتحادیې اجرایوي رییس، فهیم دشتي وایي: بهتره دا وه چې لومړی باید د معادن وزارت پر چارواکو لګېدلي تورونه څېړل شوي وای او که چېرته د اسنادو وړاندې کولو ته اړتیا وای نو دا استناد به له هشت صبح ورځپاڼې څخه غوښتل کېدل.
د رسنیو د څار بنسټ مسوول، صدیق الله توحیدي له هشت صبح ورځپاڼې سره په دغه چلند نيوکه کوي او وایي: د ټولیزو رسنیو د قانون پر بنا، له یوې رسنۍ څخه هر شکایت په لوموړي قدم کې باید د ټولیزو رسنیو د کمیسیون له لوري وڅېړل شي او که چېرته د دغه رسنۍ محتوا جرمي اړخ ولري، باید د دغه کمیسیون له لوري څارنوالۍ ته راجع شي.
فهیم دشتي هم له اطلاعات او کلتور وزیر څخه په نیوکه وایي: دا ټولې ستونزې او مشکلات د اطلاعات او کلتور وزیر د قانون ماتونې له امله دي. که چېرته د اطلاعات او کلتور وزیر د ټولیزو رسنیو د کمیسیون مانع شوی نه وای نو دا ډول قضیې به په بهترین شکل او له قانوني لارې حل او فصل کېدلې.
