نن سهار د هېواد د رسنیزې ټولنې یو شمېر استازو د پارلمان د لوړو زده کړو، معارف، کلتوري او دیني چارو د کمیسیون په ناسته کې ګډون درلود، د اطلاعات او کلتور وزیر په تکرار سره د قانون ماتونې په اړه یې خپل شکایتونه د دغه کمیسیون غړو ته وړاندې کړل.
په دې ناسته کې د اطلاعات او کلتور وزیر هم ګډون درلود. او د خبریالانو د زیاتره شکایتونو په وړاندې یې له صریح ځواب ویلو ځان وساته. په دې ناسته کې حاضرو خبریالانو ویل، چې د دوی اصلي غوښتنه د ټولیزو رسنیو د قانون تطبیق کول دي. هغوی د ټولیزو رسنیو د قانون پر جوړېدلو چې د ټولیزو رسنیو په ۴۲ مه ماده کې وړاندیز شوی وو تاکید درلود؛ مګر د اطلاعات او کلتور وزیر له دغه غوښتنې له منلو څخه د ناستې تر آخره ځان وساته.
په تېرو دریو کلونو کې، چې نوموړی د اطلاعات او کلتور وزیر وو، د ټولیزو رسنیو د کمیسیون جوړولو په ځای یې د(رسنیزو سرغړونو او شکایاتو ته د رسېدنې کمیسیون ) په نامه یې یو بل کمیسیون په غیر قانوني ډول وساته.
سید مخدوم رهین ویل، چې د یاد کمیسیون د جوړولو لپاره یې له ولسمشر څخه فرمان اخیستی دی او دا کمیسیون یې د ټولیزو رسنیو د کمیسیون پر ځای جوړ کړی دی.
په یاده ناسته کې حاضرو خبریالانو ته دا دلیل د منلو نه وو او ټینګار یې کاوه چې د ولسمشر فرمان نشي کولای چې له قانون سره په مخالفت کې واقع شي.
د پارلمان د لوړو زده کړو، معارف، کلتوري او دیني چارو د کمیسیون غړو هم د قانون پر تطبیق ټینګار کاوه. د یاد کمیسیون رییس، اغلې هیلې ارشاد وویل: ښاغلی وزیر صاحب! تاسې پوهېږئ چې د قانون په روښنایي کې، د ولسمشر فرمان چې له قانون سره مخالفت ولري، هېڅ ډول روا والی نه لري.
دوې ورځې وړاندې، هغه شکایت لیک چې د اطلاعات او کلتور وزیر د قانون ماتونې په اړه پکې له ۶۰ زیاتو رسنیزو کارکوونکو او د خبریالانو د صنفي او ملاتړو بنسټونو مسوولینو لاسلیک کړی وو، د دغه کمیسیون په واک کې ورکړل شوی وو.
همدارنګه د دغه کمیسیون غړو د ټولیزو رسنیو قانون د ۴۲ او ۴۳ موادو د تعدیل په اړه چې د اطلاعات او کلتور وزارت له لوري پشنهاد شوي وو، په ناسته کې د حاضرو خبریالانو نظرونه وغوښتل. هغوی په داسې حال کې چې وعده یې ورکړه،د دغه تعدیلاتو له څېړنې وروسته به خپل نظرونه یاد کمیسیون ته وړاندې کړي، له کمیسیون څخه یې وغوښتل ترڅو د اطلاعات او کلتور وزیر ته قناعت ورکړي چې د دغه تعدیلاتو له تصویب وړاندې رسنیزو شکایاتو او سرغړونو ته د رسېدنې غیر قانوني کمیسیون لغوه کړي او اجازه د ورکړل شي چې د ټولیزو رسنیو کمیسیون جوړ شي.
د اطلاعات او کلتور وزارت وړاندیز شوي تعدیلات د ټولیزو رسنیو د کمیسیون د وظایفو، تغیر او ترکیب په اړه دي.
د نن په ناسته کې حاضرو ګډونوالو هم ټینګار کاوه، چې د ملي شورا نورو کمیسیونونو ته به مراجعه او د اطلاعات او کلتور وزیر له قانون ماتونې به شکایت کوي.
د جنوب ختیځې آسیا(سفما/افغانستان) د خبریالانو د انجمن مسوول، ضیا بومیا، د افغانستان د ژورنالیستانو د ملي اتحادیې رییس، فهیم دشتي، د پژواک خبري آژانس مسوول، دانش کړوخېل، د هشت صبح ورځپاڼې مسوول، حسین مرتضوي له خپلواکو رسنیو او د خبریالانو د صنفي او ملاتړو بنسټونو څخه په استازیتوب د نن په ناسته کې ګډون کړی وو.
