د ولسی جرګ د غړي، عبدالستار خواصي د خبرو په غبرګون، نن سهار د افغانستان د ژورنالیستانو د ملي اتحادیې مسوولینو په یوه خبري غونډه کې د رسنیو پروړاندې د جهاد اعلام غیر منطقي او غیر قانوني بللی دی.
د روانې اونۍ په شنبه ورځ په ولسي جرګه کې د اطلاعات اوکلتور وزیر د استجواب په جریان، په مجلس کې د پروان استازي، عبدالستار عاصي د رسنیو چلوونکي اوباش وبلل او د رسنیو پروړاندې یې جهاد اعلام کړ.
د خواصي دغه ویناوې د رسنیزو کارکوونکو او د خبریالانو د صنفي او ملاتړو بنسټونو له پراخ غبرګون سره مخ شوي دي.
د نن په خبري ناسته کې، د افغانستان د ژورنالیستانو د ملي اتحادیې رییس، عبدالحمید مبارز او د یادې اتحادیې ویاند، سید محمد علي رضواني خبریالانو ته خبرې کولې.
عبدالحمید مبارز په خپلو خبرو کې وویل: زموږ رسنۍ او خبریالان باید پدې پوه شي، چې موږ تر وروستیو شیبو له دوی څخه د دفاع او ملاتړ په سنګر کې ولاړ یو.
سید محمد علي رضواني، پداسې حال کې چې د خواصي خبرې یې په افغانستان کې له نافذه قوانینو څخه بهر بللې د اطلاعات او کلتور وزیر قانون ماتونې ته په اشارې سره یې وویل: که چېرته د رسنیو له کار څخه کوم شکایت شتون ولري، باید د ټولیزو رسنیو کمیسیون جوړ شي، ترڅو دغه شکایتونو ته رسېدنه وشي.
د ټولیزو رسنیو د قانون د ۴۲ او ۴۳ مې مادې پر بنسټ، د ټولیزو رسنیو کمیسون باید اووه غړي ولري او ټول غړي يې باید د خبریالانو له مېنځه وټاکل شي، دا یو جوږښت دی چې له رسنیو څخه شکایتونو ته د رسېدنې مسوولیت لري؛ مګر د اطلاعات او کلتور وزیر په تېرو دریو کلونو کې د رسنیو قانون په پیمالولو سره د دغه کمیسیون د جوړولو مخنیوی کړی دی.
د نن ورځې خبري ناستې په یوه برخه کې، د میوند تلویزیون مدیر مسوول او د افغانستان د ژورنالیستانو د ملي اتحادیې د عالي شورا غړي، میر علي اصغر اکبر زاده د یوه خبریال پوښتنې ته په ځواب کې وویل: د افغانستان د ژورنالیستانو ملي اتحادیې هېڅکله هم د رسنیو له هغه نشراتو ملاتړ او دفاع نده کړې، کوم چې د اسلامي ارزښتونو خلاف وي او هر وخت له قانوني لارې د دا ډول نشراتو د څېړني غوښتونکي دي.
