د ۳ تلویزوني شبکې خبریال، حسین نظري، تېره ورځ د چمن حضوري په سیمه کې سخت وهل شوی دی.
دا پېښه پداسې حال کې رامنځته شوه، چې ښاغلی نظري له څو تنو نورو خبریالانو سره له یوې خبرې ناستې څخه چې د المپیک په کمېټه کې ترسره شوې وه بېرته راګرځېدل.
تراوسه د دغه برید کوونکو حویت ندی په ډاګه شوی؛ مګر داسې ویل کېږي چې پدې پېښه کې د نګاه تلویزیون د خبریال کمره هم بریدکوونکو له ځانه سره وړې ده.
یو شمېر خبریالان او په ځانګړې توکه په ټولنیزو رسنیو کې، د دغه پېښې تر شا د المپیک کمېټې د مسوولینولاس لرل بولي. دوی وایي چې دا پېښه، د ناستې په جریان کې د المپیک د کمېټې د رییس او د یک تلویزیون د خبریال ترمنځ له لفظي شخړې وروسته رامنځته شوې ده.
په همدې حال، د المپیک کمېټې مسوولین پداسې حال کې چې د یادې کمېټې د رییس او د یک تلویزیون د خبریال تر منځ لفظي شخړه تایید کوي، دوی وایې چې د ۳ تلویزون د خبریال په وهلو کې کوم رول نه لري.
په هغه اعلامیه کې چې تېره شپه د المپیک کمېټې له لوري خپره شوې، داسې راغلي دي: د المپیک کمېټې رییس د هغو خبریالانو په حضور چې برید لاندې راغلي وو، پداسې حال کې چې د شپاړسمې حوزې د پولیسو قومنمدان هم موجود وو، ژمنه وکړه چې پر خبریالانو برید کوونکي معلوم کوي.
د المپیک د مسوولینو په وینا، یو شمېر کسان چې د دغه ادارې د بدنام کولو هڅه کوي، المپیک کمېټې ودانۍ ته نږدې پر خبریالانو برید داسې وښیي، چې ګواکي دا خبریالان د المپیک کمېټې د ورزشکارانو له لوري وهل شوي دي.
د خبریالانو د صنفي او مرسته کوونکو بنسټونو مسوولین په داسې حال کې چې پر خبریالانو برید په سختو ټکو غندي، د پېښې د عاملینو د زر معلومولو غوښتونکي دي.
د افغانستان د ژورنالیستانو د ملي اتحادیې اجرایوي رییس، فهیم دشتي وایي: په هېڅ وجه د خبریالانو پروړاندې تاوتریخوالی د منلو وړ ندی او جرم دی.
نوموړی زیاتوي: د کابل پولیس د المپیک له کمېټې سره په همکارۍ باید ژر تر ژره د دغه پېښې عاملین وپېژني او په جزا یې ورسوي، ترڅو بیا هېڅوک په خبریالانو برید ونکړي.
