د خبریالانو یو شمېر صنفي او ملاتړو بنسټونو او مدني بنسټونو د ماندګار ورځپاڼې د قلم همکار، عزیزالرحمن سخي زاده د ژر خوشي کېدلو غوښتنه کړې.
په هغه خبري ناسته کې، چې تېره ورځ په دې اړه ترسره شوې وه، ګډونوالو په ټینګار سره غوښتنه درلوده، چې لویه څارنوالي د ژر تر ژره ښاغلی سخي زاده له بنده آزاد کړي.
نږدې دوې اونۍ وړاندې، عزیز الرحمن سخي زاده د اداري فساد پروړاندې د مبارزې ادارې د کړنو په نیوکې سره د یوې خپرې شوې مقالې د ځواب ویلو لپاره لویې څارنوالۍ ته غوښتل شوی او بیدون له ځنډ څخه بندي شوي دی.
په تېرو ورځو کې، زیاتې هحې وشوې ترڅو ښاغلی سخي زاده له بند څخه آزاد کړل شي، مګر د لویې څارنوالۍ مسوولینو دغه غوښتنو ته مثبت جواب ورنکړ.
د افغانستان د رسنیو د ملاتړ کوونکي بنسټ ــ نی رییس، عبدالمجیب خلوتګر د تېرې ورځې په خبرې ناسته کې وویل: دا قضیه باید په لومړي قدم په هېواد کې د رسنیو د نافذه قانون پر بنسټ د ټولیزو رسنیو د کمیسیون له لوري څېړل شوې وای؛ مګر د قانون خلاف، په مستقیمه توګه د لویې څارنوالۍ له لوري وڅېړل شوه.
د خبریالانو د صنفي او ملاتړو بنسټونو استازي په داسې حال کې چې د سخي زاده د مقالې د څېړلو غوښتنه د ادارې فساد پروړاندې د مبارزې ادارې د رییس، عزیزالله لودین قانوني حق ګڼي؛ ټینګار کوي چې په هېڅ ورت باید ښاغلي سخي زاده په زندان کې پاتې شي.
د افغانستان د ژورنالیستانو د ملي اتحادیې اجرایوي رییس، محمد فهیم دشتي، چې د تېرې ورځې د ناستې یو بل تن ویناوال وو وویل: سخي زاده نه غلا کړې، نه یې کوم څوک وژلي، نه قاچاقبر دی او نه هم کوم جنایت کار دی، چې د ده د تېښتې ډار وي او په دې دلیل سره دی په بند کې وساتل شي.
نوموړي زیاته کړه: سخي زاده باید بیدون له کوم قید او شرط څخه آزاد کړل شي او وروسته که چېرته بیا د دغه قضی د قانوني څېړنې ضرورت وو، ودې څېړل شي.
د اداري فسا پروړاندې د افغانستان د ښځو د اتلاف رییس، آغلې امینه مستقیم وویل: دولت غواړي د اداري فساد د افشا کولو لومړنۍ رېښې له بېخه خنثا کړي، مدني ټولنه او رسنۍ باید اجازه ورنکړي، ترڅو داسې پېښه رامنځته شي.
