پداسې حال کې، چې له یوې اونۍ راپدې خوا په سرپل ولایت کې د بانو غږ رادیو نشرات بند شوي دي، د همدې اونۍ په یکشنبه ورځ په هرات ولایت غوریان ولسوالۍ کې هم د صبح ندا رادیو نشرات په بندېدلو تهدید شوي دي.
په سرپل ولایت کې د بانو غږ رادیو مالک، شفع الله عزیزي وایي، د سرپل ولایت د اطلاعات او کلتور رییس د یادې رادیو له یو کارکوونکي سره د لفظي شخړي وروسته د رایو دفتر مهر او لاک کړی دی.
په همدې حال د سرپل ولایت د اطلاعات او کلتور رییس دغه ادعا نه مني او وایي چې د بانو غږ رادیو د تړل کېدلو دلیل د یادې رادیو د مسوولین له لوري د رادیو د فعالیت جواز نه وړاندې کول دي.
د سرپل ولایت د اطلاعات او کلتور رییس، عبدالقدوس فهیم: موږ په وار وار سره د بانو غږ رادیو له مسوولینو څخه وغوښتل، چې د خپل فعالیت د جواز یو نقل موږ ته راولیږي؛ مګر هغوی زموږ خبرې ته پام ونکړ او موږ نشو کولای هغه رسانه چې ذ فعالیت جواز ونلري هغه ته د فعالیت اجازه ورکړو.
د بانو غږ رادیو مسوولین دغه ادعا نه مني او دوی ټینګار کوي چې د فعالیت جواز لري. د شفیع الله عزیزي په وینا، دوی د سرپل ولایت له والي سره اړیکه نیولې ترڅو دغه ستونزه حل کړي.
د سرپل والي، عبدالجبار حقبین وایي چې د اطلاعات او کلتور رییس د ولایت له خبرولو پرته د بانو غږ رادیو تړلې ده. حقبین زیاتوي: ډېر ژر به دغه مسلې ته رسېدنه وشي.
د یو بل خبر له مخې، د هرات ولایت په غوریان ولسوالۍ کې ندای صبح رادیو مسوولین تهدید شوي، که په خپلو نشراتو کې تغیر رامنځته نکړي نو نشرات به یې بند کړل شي.
د یادې رادیو مدیر مسوول، جاوید عزیزي وایي: د یکشنبې په ورځ زموږ یو همکار د ولسوالۍ دفتر ته وغوښتل شو، پداسې حال کې چې هلته د ولسوالۍ یو شمېر ملایان هم موجود وو، ولسوال زموږ همکار تهدید کړی او ویلي یې دي، چې زموږ د رادیو نشرات به بند کړل شي.
د ندای صبح رادیو د مسوولینو په وینا، د ملایانو له لوري د یادې رادیو یو شمېر خپرونې غیر اسلامي بلل، د دغه تهدیدونو اصلي عامل دی. د عزیزي په وینا، دغه خپرونې تفریحي خپرونې دي.
د غوریان ولسوال، حاجي داوود شاه نورزایي وایي، چې نوموړي د یو شمېر علماوو په غوښتنه د یادې رادیو مسوولین غوښتي او د علماوو نظریات یې دوی ته رسولي دي.
نورزایي زیاتوي: موږ په هېڅ صورت دوي( د صبح ندا رادیو مسوولین) ندي تهدید کړي.
د افغانستان د ژورنالیستانو ملي اتحادیه، پداسې حال کې چې په سرپل او غوریانو کې له مسوولينو سره په مستقیمه اړیکه کې، هڅه کوي چې د داوړو رادیوګانو پروړاندې تهدیدونه رفع شي، اعلام کوي چې له رسنیو څخه هر رکم شکایت باید له قانوني پلوه وڅېړل شي.
د افغانستان د ژورنالیستانو د ملي اتحادیې اجرایوي رییس، فهیم دشتي وايي: هر څوک په خپله خوښه نشي کولای چې د یوې رسنۍ نشرات بند او یا هم دوی د نشراتو په بندولو تهدید کړي.
دشتي زیاتوي: که چېرته له یوې رسنۍ څخه شکایت شتون ولري، د ټولیزو رسنیو قانون د دغو شکایتونو لاره تصریح کړې ده او هېڅوک او یا هم هېڅ کومه ډله باید ځانته اجازه ورنکړې چې له قانون لوړ عمل ترسره کړي.
