نن سهار د اطلاعات او کلتور وزیر او د خبریالانو د یو شمېر صنفي او ملاتړو بنسټونو د استازو په ګډون د سنا مجلس د شکایتونو آورېدلو په کمیسیون کې ناسته ترسره شوه.
پدې ناسته کې د رسنیو د څار بنسټ مشر، صدیق الله توحیدي، د افغانستان د ژورنالیستانو د ملي اتحادیې د نشراتو رییس، میر حیدر مطهر، د طلوع تلویزیون مسوول مدیر، صدیق احمد زاده، د پژواک خبري آژانس مسوول مدیر او د امتیاز خاوند دانش کړوخېل او یو شمېر نورو د هېواد د خبریالانو په استازیتوب ګډون درلود او په لاندې مواردو کې یې مشخصې غوښتنې مطرح کړې:
ــ د ټولیزو رسنیو کمیسیون چې د ټولیزو رسنیو د قانون په ۴۲ او ۴۳ مه ماده کې راغلی، جوړ کړل شي او ( رسنیزو شکایاتو او سرغړونو ته د رسیېدنې) غیر قانوني کمیسیون د منحل کړل شي.
ــ د ټولیزو رسنیو د قانون د ۴۱ مې مادې د حکم پر مبنا، د اطلاعات او کلتور وزارت باید قبوله کړي چې د خبریالانو د صنفي او ملاتړو بنسټونو دوه تنه ټاکل شوي استازي د رسنیو د عالي شورا غړیتوب ترلاسه کړي.
د سنا مجلس د شکایتونو د آوریدلو د کمیسیون غړو او په ځانګړې توګه د یاد کمیسیون مشر، ډاکټر زلمي زابلي په صراحت او جدیت سره د خبریالانو له قانوني غوښتنو ملاتړ وکړ.
د اطلاعات او کلتور وزیر په داسې حال کې چې په تېرو دریو کلونو کې د خبریالانو له دغه غوښتنو بې پروایي کړې وه، د نن ورځې په ناسته کې قبوله کړه چې په یوه هفته کې د خبریالانو صنفي او ملاتړي بنسټونه باید دوه تنه انتخابي استازي د رسنیو په عالي شورا کې د غړیتوب لپاره او اوه تنه نور د ټولیزو رسنیو په کمیسیون کې د غړیتوب لپاره معرفي کړي.
په تېره یوه نیمه میاشت کې، د خبریالانو صنفي او ملاتړو بنسټونو د ټولیزو رسنیو د قانون د ټولو مواردو او په ځانګړې توګه د یاد قانون د ۴۱، ۴۲ او ۴۳ مې مادې د تطبیق لپاره ډېرې هلې ځلې وکړې، چې باالاخره دغه هڅو د نن په ناسته کې نتیجه ورکړه.
