د کابل پر هواي ډګر باندې د ځانمرګي برید په جریان کې، پولیسو له خبریالانو سره نه هېرېدونکې همکارۍ کړي دي. دغه ځواکونو خبریالان په خپلو موټر کې د پېښې ځای ته نږدې انتقال کړی او د خبریالانو لپاره یې د خبري پوښښ بهتره زمینه برابره کړې ده.
میرویس، هغه خبریال چې د خبري پوښښ لپاره یې د پېښې په ځای کې شتون درلود داسې وویل: پولیسو له خبریالانو سره نږدې همکاري او همغږي درلوده، موږ د پولیسو له دا ډول چلند څخه مننه کوو.
د خبریالانو صنفي او ملاتړو بنسټونو هم، له خبریالانو سره د پولیسو د دغه چلند درناوی کړی.
د افغانستان د ژورنالیستانو د ملي اتحادیې رییس، فهیم دشتي وایي: له خبریالانو سره د امنیتي ځواکونو په ځانګړې توګه د کابل د پولیسو دا چلند د ستاینې وړ دی.
د دشتي په وینا، له څو میاشتو راپدې خوا د خبریالانو یو شمېر صنفي او مرسته کوونکي بنسټونه د کورنیو چارو له وزارت او په ځانګړې توګه د دغه وزارت له مطبوعاتي دفتر سره په یو لړ نږدې اړیکو کې، هڅه کړې ترڅو په کابل کې د رامنځته کېدونکو پېښو په جریان کې د پولیسو او خبریالانو ترمنځ د همکارۍ زمینه برابره کړي.
د افغانستان د ژورنالیستانو ملي اتحادیې همداراز اعلام کړی، چې د خبریالانو او پولیسو ترمنځ د همکارۍ په زمینه برابرولو کې به یې هڅې دوام ولري.
