په هغه ناسته کې چې د رسنیو د یو شمېر مالکانو، مطرح خبریالانو، خپلواکو خبریالانو او د خبریالانو د صنفي او ملاتړو بنسټونو د مسوولینو په ګډون نن سهار د خپلواکو رسنیو د ملاتړ کوونکي ــ نی په دفتر کې ترسره شوې وه، ګډونوالو د ټولیزو رسنیو د قانون د پوره تطبیق په هدف د افغانستان د ژورنالیستانو د فدراسیون له موقف څخه ملاتړ وکړ.
په دې ناسته کې، د افغانستان د ژورنالیستانو د ملي اتحادیې رییس، عبدالحمید مبارز، محمد داوود سلطان زوی، احمد سعیدي، ضیا بومیا، صدیق الله توحیدي او محمد فهیم دشتي د هغه ستونزو په اړه خبرې وکړې، کومې چې د اطلاعات او کلتور وزیر د هېواد د رسنیز فعالیت د لارې پر سر رامنځته کړي دي.
یو شمېر ویناوالو چې د خبریالانو د صنفي او ملاتړو بنسټونو په استازیتوب خبرې کولې، د افغانستان د ژورنالیستانو د فدراسیون د شپږ میاشتنې فعالیت په اړه مفصل معلومات وړاندې کړل.
یو شمېر نورو ویناوالو هم د افغانستان د ژورنالیستانو د فدراسیون له کړنو خوښي څرګنده کړه او د هېواد د خبریالانو لپاره د دغه لوی چتر جوړول یې یو بې مثله لاسته راوړنه وبلله.
په تېرو کلونو کې، یو شمېر خبریالانو او رسنیزو مسوولینو د خبریالانو د صنفي او ملاتړو بنسټونو له فعالیتونو څخه شکایت درلود او د دغه فعالیتونو شېوه یې بې ګټې بلله. دغه برداشت تراوسه له یو شمېر خبریالانو او رسنیزو مسوولینو سره شتون لري.
د افغانستان د ژورنالیستانو د ملي اتحادیې د اجرایوي رییس او د افغانستان د ژورنالیستانو د فدراسیون د مشرتابه غړي، فهیم دشتي په وینا، په وروستیو میاشتو کې پراخې هڅې ترسره شوي دي، ترڅو د خبریالانو صنفي او مرسته کوونکي بنسټونه وکولای شي چې د رسنیو او خبریالانو له حقونو څخه د دفاع او ملاتړ په زمینه کې خپل فعالیتونه په لازمه او له پخوا څخه په ښه توګه ترسره کړي.
په هېواد کې د رسنیز فعالیت مربوطه قوانیونو د ښه کېدلو لپاره هڅې، اطلاعاتو ته د لاسرسي د قانون د تصویب غوښتنې لپاره هڅې، د حکومتي بنسټونو، بانفوذه خلکو او بنسټونو تر فشار لاندې له خبریالانو او رسنیو څخه ملاتړ، په پلازمینه کابل او ولایاتو کې د خبریالانو او رسنیزو مسوولینو ترمنځ د همغږۍ لپاره هڅې، د یاد فدراسیون په تېرو شپږو میاشتو کې له عمده فعالیتونو څخه ګڼل کیږي.
د رسنیو د څار بنسټ مسوول او د افغانستان د ژورنالیستانو د فدراسیون د مشرتابه غړی، صدیق الله توحیدي د اطلاعات او کلتور وزیر د قانون ماتونې په اړه وویل: په تېر یوه نیم کال کې، چې د رسنیو عالي شورا فعاله شوې ده، د اطلاعات او کلتور وزیر دوه تنه په غیر قانوني ډول په دې شورا کې د استازو په عنوان وګمارل او موږ هڅه کوو ترڅو دغه حالت ته تغیر ورکړو.
روانه اونۍ په شنبه ورځ، د افغانستان د ژورنالیستانو فدراسیون په یوه شفافه ټاکنو کې، چې د انتخاباتو د خپلواک کمیسیون د هیت تر نظر لاندي ترسره شول، د رسنیو د عالي شورا لپاره یې دوه تنه خبریالان وټاکل، چې د ټولیزو رسنیو د قانون پر بنا تنها همدا دوه تنه کولای شي چې په یاده شورا کې د خبریالانو استازیتوب وکړي.
په افغانستان کې د جنوب ختیځې آسیا د انجمن( سفما افغانستان) رییس، او د افغانستان د ژورنالیستانو د فدراسیون د مشرتابه هیت غړي، ضیا بومیا چې د اطلاعات او کلتور وزیر د قانون ماتونې په اړه یې خبرې کولې. رسنیزو شکایتونو او سرغړونو ته د رسېدنې د کمیسیون غیر قانوني فعالیت ته په اشارې سره یې وویل: د تېرې اونۍ په شنبه ورځ د اطلاعات او کلتور وزیر ژمنه وکړه چې د یوې اونۍ په جریان کې به رسنیزو شکایتونو او سرغړونو ته د رسېدنې غیر قانوني کمیسیون لغوه کوي؛ مګر نن له هغې ژمنې یوولس ورځې تېریږي او تراوسه پورې یاد غیر قانوني کمیسیون ندی لغوه کړل شوی.
په دې ناسته کې همدارنګه د اطلاعات او کلتور وزیر د قانون ماتونې پخاطر د هرات، پکتیا، کندهار، ننګرهار، خوست، مزار شریف او پراون ولایتونو د خبریالانو له اعتراضونو د ملاتړ خبر ورکړل شو.
