د بخدي خبري آژانس خبریال، نصرت الله اقبال تېره شپه د کبل په مکرویان سیمه کې ډېر سخت وهل شوی دی.
ښاغلی نصرت او عیني شاهدان وایي، چې نوموړی د پروان والي، عبدالبصیر سالنګي او ساتونکو لخوا وهل شوی دی.
په داسې حال کې چې د پروان والي د عبدالبصیر سالنګي له وهلو انکار کړی دی، د کابل د پولیسو قومندان وايي، چې د دغه خبریال له وهلو خبر دي؛ مګر د قضیې عاملین نه پېژني.
عبدالبصیر سالنګي ویلي: پرون ورځ تصادفا له یوه او بل سره مخ شوو او دا چې یو شمېر شخصیتونو ته یې توهین کړی وو، زموږ ترمنځ یوه لفظي شخړه رامنځته شوه او بس.
مګر د اقبال دوستانو په اجتماعي رسنیو کې لیکلي، چې د پروان د والي له لوري د نوموړي د وهل کېدلو دلیل، په هغه کتاب د اقبال د قلم نقد دی کوم چې د پروان د والي له لوري لیکل شوی او نږدې ده چې ډېر زر به خپور شي.
په ټولنیزو رسنیو کې همدارنګه له ښاغلي اقبال څخه یو تصویر خپور شوی چې په هغه کې وایي، د پروان والي د نږدې خپلوانو له لوري په کابل کې یوه رستورانت ته دعوت شوی وو او هملته د پروان د والي او ساتونکو له لوري وهل شوی وو.
د افغانستان د ژورنالیستانو ملي اتحادیې د دې پېښې په اړه د یوې اعلامیې په خپرولو سره ویلي دي، چې دغه اتحادیه د خبریالانو پروړاندې هر ډول تاوتریخوالی په کلکه غندي او هېڅوک دا حق نلري چې نور او په ځانګړې توګه خبریالان ووهي. د دغه اعلامیې په بله برخه کې راغلي دي: امنیتي بنسټونه باید ژر تر ژره د دغه پېښې عاملین معلوم او د قانون منګولو ته وسپاري.
