په بغلان کې د تنویر تلویزیون مسوولین وایي چې نن سهار د یاد تلویزیون دوه تنه خبریالان د وسلوالو کسانو له لوري سخت وهل شوي دي.
د تنویر تلویزیون مدیر مسوول، شیرمحمد جهش وایي: د موږ یو خبریال او یو فلمبردار کله چې د پلخمري ولایت د نوي ښاروال د معرفي له مراسمو څخه بیرون ته راووتل، په پخواني ښاروال پورې تړلو کسانو له لوري ووهل شول. د جهش په وینا، په تېرو ورځوکې د پلخمري ولایت د پخواني ښاروال، سید مقصود سادات له لوري دیاد ولایت د نوي ښاروال پروړاندې تظاهرات ترسره شوي وو، ترڅو د نوي ښاروال د ګومارنې مخه ونیسي.
په همدې حال، نن د پلخمري ښار نوی ښاروال په دولتي مراسمو کې په رسمي ډول معرفي شو. دې مراسمو ته خبریالان د خبري پوښښ لپاره غوښتل شوي وو او د تنویر تلویزیون خبریالان د له مراسمو څخه د بېرته ګرځېدو په وخت کې وهل شوي دي.
جهش په داسې حال کې چې وایي د خبریالانو د وهلو له جریان څخه تصویر هم لري، نوموړی زیاتوي: د هغو کسانو له جملې څخه چې زموږ خبریالان یې وهلي، د پخواني ښاروال دوه تنه ساتونکي او یو موټروان موږ پېژندلي دي.
د افغانستان د ژورنالیستانو ملي اتحادیه د بغلان ولایت له مسوولینو سره په اړیکه کې هڅه کوي، ترڅو د تنویر تلویزیون د خبریالانو د وهل کېدلو عوامل پیدا او د قانون منګولو ته وسپارل شي.
د بغلان د پولیسو قومندان، اسدالله شېزاد پدې اړه د افغانستان د ژورنالیستانو د ملي اتحاديې د غوښتنې په ځواب کې وايي: د خپل امنیت آمر ته چې زما لومړی مرستیال هم دی، دنده ورکوم ترڅو په ټول قوت سره دغه ستونزه حل کړي.
د تنویر تلویزیون مسوولین هم وایي چې د بغلان پولیسو د دغه قضیې د عاملینو په پېژندلو او نیولو کې د همکارۍ ژمنه راکړې ده.
د افغانستان د ژورنالیستانو ملي اتحادیې د هېواد له امنیتي ځواکونو غوښتي، چې د خبریالانو پروړاندې د تاوتریخوالي مخه ونیسي.
د دغه اتحادیې اجرایي رییس، فهیم دشتي وایي: موږ د کورنیو چارو وزارت له مسوولینو سره په اړیکه کې یو، ترڅو په لنډ وخت کې دغه ستونزو ته د پای ټکی کېښودل شي.
په دې وروستیو اونیو کې د خبریالانو پروړاندې تاوتریخوالی زیات شوی دی. تېره ورځ د بخدي خبري آژانس یو خبریال د پروان ولایت د والي له لوري په کابل کې وهل شوی دی.
