په دوو تېرو اونیو کې، د توبر کلوز ناروغۍ، د دغه ناروغۍ مخنیوي داو تداوي په اړه دوې زده کړیزې دورې د هېواد د عامه روغتیا وزارت له لوري د افغانستان د ژورنالیستانو د ملي اتحادیې په همکارۍ ترسره شوې. په هره زده کړیزه دوره کې له مختلفو رسنیو څخه له شل تنو زیاتو خبریالانو ګډون درلود او زده کړې یې ولیدې.
د عامه روغتیا وزارت کې د توبرکلوز کنترول د عامه پوهاوي مسوول، ډاکټر نورآقا ذاهد وايي: توبر کلوز یوه داسې ناروغي ده چې هم یې مخنیوي او هم یې تداوي کېدلی شي؛ مګر د خلکو د نه پوهاوي په دلیل، په هېواد کې په دغه ناورغي زیات شمېر مبتلا کسان خپل ځانونه له لاسه ورکوي.
د افغانستان د ژورنالیستانو ملي اتحادیه، چې د فعالیتونو یوه برخه یې زده کړیز پروګرامونه تشکیل کوي، د دا ډول زده کړیزو دوره په ترسره کولو کې هڅه کوي ترڅو د ټولنې د خلکو پروړاندې یې خپل مسوولیت ادا شي.
د یادې اتحادیې اجرایوي رییس، محمد فهیم دشتي وایي: خبریالان کولای شي له رسنیو څخه په ګټه اخیستنه هغه اطلاعات چې د توبرکلوز ناروغۍ د عواملو، مخنیوي او د یادې ناروغۍ د تداوۍ په اړه ترلاسه کړي نورو ته ورسوي او له همدې لارې د دغه ناروغۍ په کنترول کې خپل نشق ولوبوي.
په تېرو دوو میاشتو کې، مختلفې زده کړیزې دورې د افغانستان د ژورنالیستانو ملي اتحادیې له لوري ترسره شوي دي، چې مهمې یې د(خبریالان او ټاکنې) دوې زده کړیزې دورې وې چې د المان(دویچوله اکادمۍ) په همکارۍ ترسره شوې او دوې نورې د(خبریالان او قوانین) زده کړیزې دورې وې.
د(خبریالان او قوانین) زده کړیزه دوره چې یوه میاشت وړاندې د پلند سفارت په کمک په کابل کې پیل شوه، د عقرب میاشتې تر شلمې نېټې دوام کوي. نږدې ده چې دغه زده کړیزه دوره د بلخ، خوست، ننګرهار او هرات ولایتونو کې هم ترسره شي.
