سنا مجلس د سه شنبې ورځې په خپله ناسته کې، هغه تعدیلات چې د استازو مجلس، د ټولیزو رسنیو په قانون کې د تغیراتو راوستلو لپاره تصویب کړي وو ونه منل.
د استازو مجلس له لوري د تصویب شوو تعدیلاتو پر اساس، باید(رسنیزو سرغړونو ته د رسیده ګۍ) تر نامه لاندې کمیسیون جوړ شوی وای او د هغه ریاست د اطلاعات او کلتور وزیز په غاړه لرلی.
دوې اونۍ وړاندې د استازو مجلس، د ټولیزو رسنیو قانون درې مادو د تعدیل طرحه چې د اطلاعات او کلتور وزارت له لوري وړاندیز شوې وه، تصویب کړه. د استازو جرګې دغه اقدام د خبریالانو د صنفي او ملاتړو بنسټونو او رسنیزو فعالانو له مخالفت سره مخ شو.
په تېرو دوو اونیو کې د خبریالانو استازو د سنا مجلس له رییس، مرستیال او مختلفو کمیسیونونو سره د لیدلو په ترځ کې، غوښتنه وکړه ترڅو د رسنیو قانون په اړه د استازو جرګې مصوبه، د سنا مجلس له لوري رد شي.
د افغانستان د ژورنالیستانو فدراسیون، چې د ژورنالیستانو د صنفي او ملاتړو ۹ بنسټونو څخه تشکیل شوی دی، هڅه کوي ترڅو د دواړو مجلسونو ګډه کمېټه، د رسنیو قانون د تعدیل طرحه کاملآ رد کړي.
د افغانستان د ژورنالیستانو ملي اتحادیې اجرایوي رییس او د افغانستان د ژورنالیستانو فدراسیون د رهبرۍ هییت غړی، محمد فهیم دشتي وایي: په ډاډ سره چې د اطلاعات او کلتور وزیر تر ریاست لاندې رسنیزو سرغړونو ته د رسیده ګۍ کمیسیون جوړول، به د دې سبب شي چې په دولت کې ځینې کړۍ به پر رسنیو او د بیان پر آزادۍ د زیاتو محدودیتونو جوړولو قانوني زمینه ترلاسه کړي.
نوموړی زیاتوي: د بیان آزادي چې د ۱۲ آخرو کلنو ترټولو لویه لاسته راوړنه ده. د هېواد له ملي شورا څخه زموږ غوښتنه داده، ترڅو دا اجازه ورنه کړي چې د اطلاعات او کلتور وزیر په څېر د دا ډول کسانو د سلیقه وي اعمالو له اثره زیان وویني.
