یوه زده کړیزه دوره چې د افغانستان د ژورنالیستانو ملي اتحادیې له لوري په جلال آباد ښار کې د خبریالانو لپاره په لار اچول شوې وه پای ته ورسېده. په دغه دوه اونیزه زده کړیزه دوره کې نږدې شل تنو خبریالانو چې د جلال آباد ښار په مختلفو رسنیو کې فعالیت کوي، ګډون کړی وو.
د ژورنالیزم حرفوي معیارونه، اخلاقي او حقوقي زده کړې د دغه زده کړیزې دورې اصلي محتوا وه. په دې دوره کې خبریالانو په افغانستان کې د رسنیزو فعالیتونو د مختلفو قوانینو په اړه زده کړې وکړې.
له اساسي قانون، د ټولیزو رسنیو قانون، اطلاعاتو ته د لارسي حق قانون، د ټاکنو او مالیاتو له قوانینو څخه یوه برخه او همدارنګه د داخلي او خارجي امنیت پر وړاندې د جزا او جرایمو د قانون احکامو مواد، چې په هېواد کې د رسنیزو فعالیتونو تنظیم کوونکي دي چې اکثره خبریالان له هغو سره آشنایي نه لري.
د افغانستان د ژورنالیستانو ملي اتحادیه په کابل کې د پولنډ سفارت په همکارۍ، له قوانینو سره د خبریالانو د بهتره بلدیلو لپاره، په پنځه ولایتونو(کابل، خوست، بلخ، هرات او ننګرهار) کې زده کړیزې دورې په لاره اچوي چې له دې جملې څخه د کابل او ننګرهار زده کړیزې دورې پای ته رسېدلي او په نورو اونیو کې به د خوست، مزارشریف او هرات خبریالان هم له دغه زده کړو څخه برخمن شي.
