له شل تنو زیاتو افغان خبریالانو په یوه زده کړیز ورکشاف کې، چې د آلماني انستیتوت(دویچوله) له لوري د افغانستان د ژورنالیستانو ملي اتحادیې په همکارۍ ترسره شو، ګډون وکړ.
په دې ورکشاپ کې چې په یوې اونیزې دوو دورو کې په کابل کې ترسره شوی وو، آلماني ښوونکو، افغان خبریالانو ته د ټاکنو د ستندرد خبري پوښښ د لارو چارو په اړه زده کړې ورکړې.
په ياد ورکشاپ کې د کابل ولایت د خبریالانو ترڅنګ د کندهار، هلمند، پنجشېر، پروان، ننګرهار، کاپیسا، پکتیا، لغمان، غور، بغلان، کندز، تخار، او بامیانو خبریالانو هم ګډون کړی وو.
د افغانستان د ژورنالیستانو ملي اتحادیې اجرایوي رییس، محمد فهیم دشتي د دغه ورکشاپ په اړه وویل: ښکاره ده چې راتلونکې ولسمشریزې ټاکنې، د افغانستان لپاره خورا مهمې دي او معیاري خبري پوښښ کولای شي چې تریوې زیاتې اندازې د دغه ټاکنو سلامتي تامین کړي.
د یاد ورکشاپ ګډونوالو، ددې ترڅنګ چې د افغانستان د ژورنالیستانو ملي اتحادیې او دویچوله لهخ انستیتوت له هڅو څخه مننه کوي، په دې باور دي چې له دغه ورکشاپ څخه د ترلاسه شوو زده کړو څخه د کار اخیستنې کولای شي په ښه ډول د ټاکنو پّ جریان کې خپلې دندې ترسره کړي.
مینا عظیمي چې له کندز ولایت څخه په دغه ورکشاپ کې د ګډون لپاره کابل ته راغلې ده وایي: زموږ خبریالان باید د نورو هېوادونو له تجربو څخه ګټه واخلي په ځانګړې توګه د هغه هېوادونو چې په هغو کې دیموکراسي ټینګې پایې لري، ترڅو وکولای شي په معیاري خبر رسولو سره، په هېواد کې دیموکراتیکې پروسې ډېرې تسهیل کړي.
دوې میاشتې وړاندې هم په کابل کې د افغانستان د ژورنالیستانو ملي اتحادیې او دویچوله انستیتوت په همکارۍ دې ته ورته ورکشاپونه جوړ شوي وو چې په هغه کې د پلازمېنې د فعالو رسنیو اکثره خبریالانو ګډون درلود.
