په بغلان ولایت کې یو شمېر خبریالان او د کارنکور ګډونوال د ملي امنیت سرتېرو له لوري هغه وخت ووهل شول، کله چې د دولسم صنف یو شمېر فارغانو په کانکور کې د ګډون کارت دوی ته له نه وېشل کېدو څخه رسنیو ته شکایت کوو.
د ملي امنیت سرتېرو لومړی هڅه کوله چې د هغه خبریالانو مخه ونیسي کومو چې د دولسم ټولګي له فارغینو سره په کانکور کې د ګډون لپاره د دوي د کارتونو د نه وېښل کېدو په اړه مرکه کوله او کله چې چې خبریالانو وغوښتل خپل کار ته دوام ورکړي، هم یې دوی او هم یې یوشمېر شکایت کوونکي ووهل.
په بغلان ولایت کې د افغانستان د ژورنالیستانو ملي اتحادیې مسوول، شېرمحمد جهش وایي، چې د نن په پېښه کې د تنویر تلویزیون یو خبریال د آریانا تلویزیون یو خبریال او همدارنګه د افغان غږ آژانس یو خبریال وهل او ټکول شوي دي.
د ښاغلي جهش په وینا: نږدې ده چې سبا ورځ د افغانستان د ژورنالیستانو د ملي اتحادیې ولایتي دفتر د بغلان ولایت له امنیتي چارواکو سره په ناسته کې دغه پېښه وڅیړي.
د بغلان ولایت دولتي چارواکو ویلي دي، د هغه امنیتي سرتېرو د پېژندلو په صورت کې چې نن یې خبریالان او د دولسم ټولګي فارغان ویلي دي، هغوی به تر قانوني څېړنې لاندې ونیسي.
د افغانستان د ژورنالیستانو ملي اتحادیه په داسې حال کې چې د خبریالانو پروړاندې هر ډول تاوتریخوالی غندي، اعلام کوي چې د ملي امنیت عمومي ریاست له لارې به دغه قضیه وڅېړل شي.
د یادې اتحادیې اجرایه رییس، محمد فهیم دشتي وايي: په داسې حال کې چې په بغلان ولایت کې به زموږ همکاران دغه قضیه تعقیب کړي، موږ به هم د ملي امنیت له ریاست سره په اړیکه کې شو، ترڅو د دغه قضیې عاملین تر ًانوني څېړنې لاندې ونیول شي.
