نن سهار د کابل په وزیر اکبرخان سیمه کې یو سویډنی خبریال په ډزو سره ووژل شو.
نیلز هارنر، چې په کابل کې د سویډن رادیو خبریال وو، نن سهار د ناپېژندو وسلوالو کسانو له لوري ووژل شو. په کابل کې د پولیسو چارواکي وایي چې د دغه پېښې په اړه یې پراخې پلټنې پیل کړي دي او پایلې به یې ډېر ژر له عامه ذهنونو سره شریکې کړل شي.
په کابل کې د سویډن سفارت مسوولینو هم د دغه پېښې په اړه د تاسف په ښکاره کولو سره ویلي دي، چې له افغان امنیتي چارواکو سره په اړیکه کي دي ترڅو د دغه پېښط جزیات ترلاسه کړي.
په کابل کې د خبریالانو صنفي او ملاتړو بنسټونو، دغه پېښه غندلې او د امنیتي چارواکو له لوري یې د دغه قضیې د عاملینو د پېژندل کېدو غوښتنه کړې.
د افغانستان د ژونالیستانو ملي اتحادیې اجرایه رییس، محمد فهیم دشتي وایي: د خبریال په وړاندې تاوتریخوالی او په ځانګړې توګه د یوه خبریال وژنه، هېڅ د زغملو وړ نه ده او حکومت باید د خبریالانو په خوندیتوب کې له دې زیاتې هڅې وکړي.
نوړي په داسې حال کې چې سویډني خبریالانو او د نیلز هارنر کورنۍ ته یې تسلیت ښکاره کوو، زیاته کړه: موږ هڅه کوو چې له امنیتي مسوولینو سره په نږدې اړیکه کې شو ترڅو د دغه پېښط دلیل او د هغه عاملین په ډاګه شي.
نیلز هارنر، شپږم خبریال دی چې د طالبانو له دورې وروسته په افغانستان کې خپل ځان له لاسه ورکوي.
